Ngalobunye busuku, Nebukhadnezari waba neliphupho lelametfusa. Ngako wabita bantfu labachaza emaphupho kuze batomchazela kutsi lisho kutsini. Kodvwa bonkhe behluleka. Wase ubita Danyela.

Nebukhadnezari watsi kuDanyela: ‘Ephusheni lami ngibone sihlahla embikwami, sakhula kakhulu saze satsintsa sibhakabhaka. Sasibonakala emhlabeni wonkhe. Emacembe aso abemahle netitselo taso titinyenti. Tilwane betilele phasi kwemtfunti waso, netinyoni takhele tidleke emagaleni aso. Ingilosi yehla ivela ezulwini, yatsi: “Sijube leso sihlahla, ucote emagala aso, kodvwa sicu saso netimphandze taso ungakujubi, akusale emhlabatsini, ukubophe ngensimbi nangelitfusi. Ingcondvo yakhe ayigucuke ekubeni yemuntfu, yena anikwe ingcondvo yetilwane kuze kuphele iminyaka lengu-7. Bonkhe bantfu batawukwati kutsi Nkulunkulu unguMbusi futsi imibuso uyinika nome ngubani latsandza kumupha yona.”’

Jehova watjela Danyela kutsi belisho kutsini leliphupho. Kwatsi Danyela nakeva inchazelo yalo, wacala kwesaba. Watsi enkhosini: ‘Nkhosi yami, kube mane leliphupho belicondzene netitsa takho, kodvwa licondzene nawe. Nguwe lesihlahla lesajutjwa. Utawucoshwa emkhatsini webantfu bese udla tjani njengetilwane tesiganga. Njengobe ingilosi yatsi ungasijubi sicu salesihlahla, kusho kutsi uyawuphindze ube yinkhosi.’

Ngemuva kwemnyaka, kwatsi Nebukhadinezari asahambahamba etulu eluphahleni lwesigodlo sakhe saseBhabhulona, watsi: ‘Awubuke indlela lelilihle ngayo lidolobha lengalakha ngemandla ami lamakhulu!’ Asakhuluma, weva livi livela ezulwini litsi: ‘Nebukhadinezari! Nyalo awusesiyo inkhosi.’

Ngaleso sikhatsi, Nebukhadinezari wacala kuhlanya futsi wafana nesilwane sesiganga. Wakhishwa esigodlweni sakhe, wahlala ehlatsini netilwane tesiganga. Tinwele taNebukhadinezari takhula taba tindze kakhulu futsi netingalo takhe besetifana netingalo tenyoni.

 Ngemuva kweminyaka lengu-7, Nebukhadinezari abengasahlanyi, ngako Jehova waphindze wamenta inkhosi yaseBhabhulona. Nebukhadinezari wase utsi: ‘Ngidvumisa Jehova inkhosi yasezulwini. Nyalo sengiyati kutsi Jehova unguMbusi. Uyabatfobisa labatigcabhako futsi angabeka nome ngangubani kutsi abe yinkhosi.’