Piạ su sěhěbi, Nebukhadnezar nakaěbạ ipi makạtatakụ. I sie nẹ̌kui manga mapapandeng ilmu gaib gunang mělahẹ apa mangal᷊ene ipi ene. Katewe, tawẹ apa makal᷊ahẹ ipine. Samurine, Datu nẹ̌běke ipi ene si Daniel.

Datu naul᷊ị si Daniel, ’Iạ nakaěbạ ipi soal u kalu gěguwạ. Kalu ene nakoạ sěbạe marangẹ-dangẹ nẹ̌datingu langị kụ botonge kasilong bọu patikụ dunia. Daukalune sěbạe mahěbung, buane mal᷊awọ. Manga binatang nẹ̌kělung su al᷊ungu kalu ene, kụ manga burung nẹ̌sal᷊ehẹ̌ su manga lelange. Bọu ene, piạ malaekatẹ̌ limintụ bọu sorga. I sie naul᷊ị, ”Tuwang kalu ene, kụ těnto manga lelange. Katewe, tuide dingangu hamụe balạe su ral᷊ungu ěntana. Ikị tuide dingangu uase lai tembaga. Naungu kalu ene sarung mẹ̌bal᷊ui, bọu naungu taumata makoạ naungu binatang, kụ balạe tatapẹ̌ kerene sarang pitu masa. Kěbị taumata sarung makasingkạ Mawu kai Měngangawasa kụ i Sie botonge měhengkẹ si sai apang nipile-Ne gunang makoạ Datu.”’

Yehuwa naul᷊ị si Daniel apa mangal᷊ene ipi ene. Su tempong i Daniel nakaěna, i sie natakụ. I sie naul᷊ị, ’Oh Datuku, iạ mělẹ̌harapẹ̌ ipi ene mariadi su manga sědụu. Katewe kalu ene kai i Tuang. I Tuang seng tawe mẹ̌parenta kụ sarung kumaěng onasẹ̌ kere binatang. Katewe, ual᷊ingu malaekatẹ̌ ene nẹ̌bera tuidẹ̌ dingangu hamụ u kalu ene niwala, i Tuang sarung saụ mẹ̌parenta.’

Sěntaung tuhụe, Nebukhadnezar dụdal᷊eng su wowong istanane, apidu mědẹ̌dalo soa Babilon. I sie nẹ̌bera, ’Sěbạe mapaelẹ̌ soa seng taku nikoạ ini. Iạ memang jago!’ Su tempong i sie bědang měbẹ̌bisara, i sie nakaringihẹ̌ tingihẹ̌ bọu sorga, ’Nebukhadnezar! Orasẹ̌ ini lai, i kau seng tawe mẹ̌parenta.’

Su tempo ene lai, Nebukhadnezar apidu nẹ̌pulu kụ kakanoạe nakoạ kere binatang. I sie niuserẹ̌ bọu istanane kụ nẹ̌tanạ dingangu binatang su kěhu. Utạe nanandụ kere dukụu burung kasiahe, kụ kanukune kere kanukung burung.

 Pitu taung tuhụe, Nebukhadnezar napia, kụ Yehuwa saụ něhengkẹ si sie nakoạ datung Babilon. Bọu ene Nebukhadnezar nẹ̌bera, ’Karaloko i Yehuwa, Datu měkẹ̌kawasa su sorga. Orasẹ̌ ini iạ masingkạ i Yehuwa kai Měngangawasa. I Sie mapakameang taumata maobotẹ̌, dingangu botonge měhengkẹ taumata apang nipile-Ne gunang makoạ datu.’