Mbá mbruʼun, Nabucodonosor nigiʼdoo mbá xnuʼndaa rí niʼni mamiñúu wéñuʼ. Nindxaʼwún xa̱bi̱i̱ bi̱ nduyáá wéñuʼ mú muthán ndiéjunʼ eyoo gáʼthúu̱n xnuʼndaa ndrígóo, mú nimbáa tájmaa gáʼthi. Nda̱wa̱á, rey niʼthúu̱n Daniel.

Nabucodonosor niʼthúu̱n Daniel: “Náa xnuʼndaa ndi̱yo̱o̱ mbá ixi̱ rí ndija̱a̱ asndu ni̱jkha̱nú mekhuíí. Rí nakujmaa asndu náa xúgíʼ tsu̱du̱u̱ ku̱ba̱ʼ. Gíʼdoo inúu mitsaan wéñuʼ ga̱jma̱a̱ gíʼdoo wéñuʼ xndúu. Xujkhúʼ ndu̱ya̱a̱ xu̱únʼ náa xkamixa ndrígóo, ga̱jma̱a̱ ñu̱ʼu̱ nuni xájúnʼ náa ñawúunʼ. Nda̱wa̱á, mbáa ángel nigajtaa náa mekhuíí ga̱jma̱a̱ niʼthí gakhi̱i̱: ‹¡Gurujtula ixi̱ ga̱jma̱a̱ gundrígula ñawúunʼ! Mú guniʼñáanʼ chíʼgíʼ xmindiuʼ ga̱jma̱a̱ ajmu̱u̱. Ma̱ngaa gurajkuáa cinturón ndrígóo hierro ga̱jma̱a̱ cobre mbájndi. A̱jkiu̱u̱n ixi̱ maxtiʼkhu̱u̱. Ní xánindxu̱u̱ xóo a̱jkiu̱u̱n mbáa xa̱bu̱, mani̱ndxu̱u̱ xóo a̱jkiu̱u̱n mbáa xujkhúʼ. Ga̱jma̱a̱ manújngoo juwan tiempo. Xúgínʼ mbuyáá rí Dios nindxu̱u̱ bi̱ naʼtáñajúnʼ ga̱jma̱a̱ rí ikhaa ma̱ndoo maxnúu reino asndu tsáa›”.

Jeobá niʼthúu̱n Daniel ndiéjunʼ eyoo gáʼthúu̱n xnuʼndaa. Índo̱ Daniel nikro̱ʼo̱o̱ xnuʼndaa, nimiñun. Niʼthí: “Oh, rey, májánʼ gáʼni rí xa̱bu̱ sia̱nʼ guguaʼnii rí nitagundaa, mú ikháánʼ gagíʼnaaʼ. Ixi̱ mba̱a̱ wéñuʼ rí nithu ni̱ndxa̱ʼ ikháánʼ. Mandatíga̱a̱ʼ reino ndrígáʼ ga̱jma̱a̱ miʼtsu raxa xóo mbá xujkhú xáná. Mú ángel niʼthí dí maguanúu mbá chíʼgíʼ ixi̱ rí nithu ga̱jma̱a̱ ajmu̱u̱. Rúʼko̱ nandoo gáʼthúu̱n rí matangaán manindxa̱ʼ rey”.

Mbá tsiguʼ nda̱wa̱á, Nabucodonosor jngruigo̱o̱ náa tsu̱du̱u̱ palacio ndrígóo ga̱jma̱a̱ nigíʼdu̱u̱ niniguʼ Babilonia. Niʼthí: “¡Ra̱ʼkhá tháán mitsaan xuajen rí nini! ¡Nda̱wa̱a̱ imba̱a̱ xóo ikhúúnʼ!”. Índo̱ xtáa raʼthí rúʼko̱, mbá aʼwáʼ náa mekhu niʼthúu̱n: “¡Nabucodonosor! Nindatíga̱ reino ndrígáʼ”.

Ikhú mbiʼi rúʼko̱, Nabucodonosor niguajta skáguiinʼ ga̱jma̱a̱ nigíʼdu̱u̱ niʼni xóo mbáa xujkhú xáná. Ikha jngó nixkriyaʼ náa palacio ndrígóo, ga̱jma̱a̱ ni̱jkha̱ gáxtáa gajmíi̱n xujkhú xáná. Xtátsúun edxu̱u̱ ndiʼya wéñuʼ rí asndu nakujmaa xóo xniunʼ bi̱yú, ga̱jma̱a̱ xngáñunʼ niʼni mbi̱jua̱ wéñuʼ rí asndu nakujmaa xóo xngáñunʼ mbáa ñu̱ʼu̱.

 Nda̱wa̱á rí ninújngoo mbá juwan tsiguʼ, Nabucodonosor niʼni̱i̱ a̱jkiu̱u̱n, ga̱jma̱a̱ Jeobá niʼni rí mani̱ndxu̱u̱ rey mbu̱júu̱ʼ náa Babilonia. Ikhú, Nabucodonosor niʼthí: “Nani mba̱a̱ Jeobá, Rey ndrígóo mekhu. Ikhaa naʼni ma̱jti̱nʼ xa̱bu̱ bi̱ nuni mbaʼumíjna̱. Xúgi̱ nda̱yo̱o̱ rí Jeobá nindxu̱u̱ bi̱ Naʼtáñajunʼ ga̱jma̱a̱ ma̱ndoo maxnúu reino asndu tsáa”.