Jun akwal, ja Nabucodonosor ajyi jun swayich bʼa jel aji xiwuk. Spaya ja matik jel bibo bʼa oj aljukyabʼ jas stojol ja swayichi, pe mini june maʼ snaʼa xcholjelyabʼ. Masan ja mandaranum yala yabʼ ja Daniel.

Ja Nabucodonosor yalyabʼ ja Daniel: «Ja bʼa jwayichi, kila jun teʼ. Ja teʼi kʼiʼi masan kʼot man satkʼinal. Wa xbʼobʼ ilxuk chikan bʼa lugaril ja bʼa luʼumi. Jel tsamalik ja spowili sok jel ja sati. Ja chanteʼiki ti wa xjijliye bʼa yibʼel, jaxa yal chaniki wa skʼulan soj ja bʼa skʼabʼiki. Tixa koʼkon jun anjel ja bʼa satkʼinali sok awani: ‹¡Kʼutsuwik el ja teʼi sok awik eluk ja skʼabʼiki! Pe awikan xetʼan ja stopi lajan soka yechiki. Sok mochowik sok sincho bʼa fierro sok bʼa kobre. Ja skʼujul ja teʼi oj tukbʼuk. Mixa oj ajyuk skʼujol jun winik, bʼajxa jun chante. Sok oj ekʼuk juke tyempo. Spetsanile oj snaʼe ja Dyos yeʼn ja Mandaranum soka yeʼn ojni bʼobʼ yayi jun mandaranel chikan maʼ wa skʼana oj yayi›».

Ja Jyoba yalyabʼ ja Daniel jas wa stojolan ja wayichali. Yajni ja Daniel yabʼ stojolil, jel xiwi. Yala: «Ah, mandaranum, jaʼuktobʼi oj ekʼ sbʼaj jawa kontraʼik ja jas awaychini, pe ja it weʼn oj ekʼuka bʼaj. Ja niwan teʼ kʼutsji weʼn kʼotela. Oj chʼayuk jawa mandaraneli sok oja wabʼ kʼulik ja bʼa jobʼ jastal jun kʼakʼal chante. Pe ja anjel yala oj yawekan xetʼan stop lajan soka yechiki. Ja jaw wa stojolan oj cha kumxan ja bʼa wa mandaranel».

Ekʼ jun jabʼil, ja Nabucodonosor ti wan paxyal bʼa yolom snaj sok kan spensaraʼuk sbʼaja Babilonia. Ja yeʼn yala: «¡Jun chonabʼ jel cham yiljel bʼa keʼn jkʼulunej! ¡Mini maʼ oj slajona!». Malan wan yaljel ja it, abʼxi jun kʼumal ja bʼa satkʼinal: «¡Nabucodonosor! Wanto chʼay jawa mandaraneli».

Ja bʼa jutsʼin jaw, ja Nabucodonosor jom yolom sok pax jastal jun chante. Ja yuj aji eluk ja bʼa snaji, ti ajyi soka chanteʼik ja bʼa yoj kʼuli. Ja stsoʼotsil yolomi jel kʼiʼi sok oj slaj jastal ja skʼukʼmal jun águila, jaxa yechiki jel najatbʼi jastal bʼa jun yal chan.

Ekʼ juke jabʼil, ja Nabucodonosor cha kʼot jastal ajyi, jaxa Jyoba cha  ya kumxuk ja bʼa smandaranel bʼa Babilonia. Anto, ja Nabucodonosor yala: «Wa xkayi stoyjel ja Jyoba, ja Mandaranum ja bʼa satkʼinali. Ja yeʼn wa xya kʼixwuk ja matik jel niwan xyaʼa sbʼaji. Ja wego wa xnaʼa ja Jyoba yeʼn ja Mandaranumi sok wa xbʼobʼ yayi jun mandaranel chikan maʼ wa skʼana oj yayi».