I te hoê po, ua moemoeâ Nebukanesa i te hoê moemoeâ riaria mau. Ua ani oia i ta ˈna mau taata î i te paari ia faaite mai eaha to ˈna auraa. Aita râ ratou i nehenehe e faataa i te reira. I te pae hopea, ua paraparau ïa te arii ia Daniela.

Teie ta te arii i parau ia Daniela: ‘I roto i ta ˈu moemoeâ, ua ite au i te hoê tumu raau. Mea teitei roa e tae roa ˈtu te reira i te raˈi. E itehia teie tumu raau mai te mau vahi atoa o te fenua. E rauere nehenehe roa e e rave rahi maa hotu to teie tumu raau. Ua faaea noa te mau animara i raro aˈe i te marumaru o teie tumu raau e ua hamani te mau manu i to ratou ofaaraa i nia i te mau amaa. I muri iho, ua haere mai te hoê melahi mai te raˈi mai. Ua tuô oia: “A tâpû i te tumu raau e a tapûpû i te mau amaa. Ia vaiihohia râ te tumu e te aˈa. A haaati i te reira e te mau nati auri e te veo. Mai te aau taata te aau o teie tumu raau. E monohia râ te reira e te aau o te hoê animara e e hitu tau te mairi. E ite te mau taata atoa e o te Atua te faatere nei e e faatoroa Oia i te taata ta ˈNa e hinaaro ei arii.”’

Ua faaite Iehova ia Daniela i te auraa o te moemoeâ. A taa ˈi Daniela i to ˈna auraa, ua riaria roa oia. Ua na ô Daniela: ‘E te arii e, e ere teie moemoeâ no nia i to oe mau enemi, no nia râ ia oe. Te tumu raau teitei tei tâpûhia, o oe ïa. E ere oe i ta oe faatereraa arii e e amu oe i te aihere i roto i te faaapu mai te hoê animara taehae. No te mea râ e ua parau te melahi ia vaiihohia te tumu e te aˈa, tera ïa te auraa, e riro faahou oe ei arii.’

Hoê matahiti i muri aˈe, ua haere Nebukanesa i nia i te tafare parahurahu o to ˈna aorai no te mataitai i te oire o Babulonia. Ua na ô oia: ‘A hiˈo na i teie oire nehenehe mau ta ˈu i patu. Mea faahiahia roa vau!’ A paraparau ai Nebukanesa, ua faaroo atura oia i te hoê reo mai te raˈi mai tei na ô atu: ‘E Nebukanesa e, e ere oe i ta oe faatereraa arii i teie nei.’

I tera taime, ua maamaahia o Nebukanesa e ua riro mai oia mai te hoê animara taehae. Ua faahepohia oia ia faarue i to ˈna aorai e ia ora i rotopu i te mau animara taehae i roto i te faaapu. Mea roroa to ˈna rouru mai te mau huruhuru o te aeto e ua tupu to ˈna maiuu mai to te manu ra.

 E hitu matahiti tei mairi. Aita Nebukanesa i maamaa faahou e ua faatoroa Iehova ia ˈna ei arii no Babulonia. I muri iho, ua parau Nebukanesa: ‘Te faahanahana nei au ia Iehova e, te Arii o te raˈi. Ua ite ia ˈu e o Iehova te faatere nei. Te faahaehaa nei Oia i te feia teoteo e te faatoroa nei Oia i te taata ta ˈNa e hinaaro ei arii.’