Бир дүне Навуходоносор хаан коргунчуг дүш дүжээн. Хаан мерген угаанныгларын кыйгырып алгаш, ол дүштүң утказын тайылбырлап бээрин дужааган. Ынчалза-даа олар чадап каан. Оон хаан Даниилди кыйгыртып алган.

Навуходоносор Даниилге мынча дээн: «Мен бедии дээрде чедип турар дыка улуг ыяш дүжедим. Ол черниң ужу-кыдыынга чедир көстүп турар болду. Ыяш аажок көвей кат-чимистиг, чараш бүрүлерлиг, аң-меңнер хөлегезинге дыштанып, куштар будуктарында уялар кылып алган чорду. Оон дээрден ангел бадып келгеш, алгырды: „Бо ыяшты ужургаш, будуктарын кезиңер. Ооң чүгле төжээ артсын. Төжээн демир болгаш хүлер-биле кинчилеп калыңар. Ол „ыяш“ кижиниң эвес, а аң-меңниң чүрээн эдилезин. Ооң соонда чеди үе эртер. Шупту улус Бурганны кол чагырыкчы деп база хаан эргени кымга бээрин ол боду шиитпирлээр деп билип каар“».

Иегова Даниилге ол дүштү тайылбырлап бээрге, ол корга берген. Хаанга ол мынча дээн: «О хааным, ол дүш силерге эвес, а дайзыннарыңарга хамааржыр турган болза көрүңерем. Ужуруп каапкан улуг ыяш дээрге силер-дир силер. Силер ам хаан болбас силер, а черлик дириг амытаннар-биле кады чурттап, олар-биле кады сиген чиир силер. Ынчалза-даа ангел ол ыяштың төжээн арттырып каан. Ол дээрге силерни катап хааннай бээр дээни ол-дур».

Бир чыл эрткенде, Навуходоносор бажыңының кырынга дыштанып, Вавилонну магадап көрүп турган. Оон ол: «Кандыг кончуг чараш хоорай тудуп алган кижи мен! Меңээ чедер кым-даа чок!» — деп мактанып, өрү көрдүнген. Хенертен дээрден үн дыңналган: «Навуходоносор! Сен ам хаан эвес апарган сен!»

Ол-ла дораан Навуходоносор тенек аарый бергеш, дириг амытан дег алдынып эгелээрге, ону ордузундан ойладыпкан. Ынчан ол черлик амытаннар аразынга чурттап эгелээн. Бажының дүгү эзирниң чүглери дег, а дыргактары кускун дыргаа дег апарган.

 Чеди чыл эрткенде, Навуходоносорнуң угаан-сарыылы эглип келген. Иегова ону катап Вавилоннуң хааны кылдыр кылып каан. Ынчан Навуходоносор мынча дээн: «Дээрлерниң хааны Иегова Бурганны алдаржыдып тур мен! Иегова — Өндүр улуг Чагырыкчы деп ам-на билдим. Бодун өрү көрдүнер улусту ол томаартыр, а күзээн кижизинге хаан эргени бээр».