Ta jun ajkʼabal, te Nabucodonosor ay bin la swayichin te bayal xiw yuʼune. La yikʼtiklan tal te pʼijil winiketik yuʼun, swenta ya xcholbot yaʼiy te bin ya skʼan ya yal te swayiche, pero maʼyuk machʼa juʼ yuʼun scholbeyel. Ta patil, te ajwalil la skʼopon te Daniel.

Te Nabucodonosor jich la yalbey te Daniel: «Ta jwayich la kil jpejt teʼ te mukʼub sok kʼot sniʼil kʼalal ta chʼulchan. Ta bayuknax chikan ta ilel. Kʼax tʼujbil te yaʼbenal sok bayal sit. Te chambalametik ya skux yoʼtanik ta yaxinal, te jaʼmal mutetik ya spas spechechik ta skʼabkʼab. Ta patil, jtul chʼul-abat ko tal ta chʼulchan sok jich la yal: “¡Tsʼetaik te teʼe sok lokʼesbeyaik te skʼabkʼab! Jaʼnax ya awijkʼitaybeyik te schumanteʼel sok te yisime. Chukaik ta sjoyobal ta hierro sok ta cobre. Te yoʼtan te teʼe yame xjelon. Ma yoʼtanukix ants winik, yoʼtan chambalam ya xkʼot. Sok ya xkʼax jukeb jaʼbil. Yame yil spisilik te jaʼ mukʼul Ajwalil te Diose sok te jaʼ ya xjuʼ ya yakʼbey yaʼtel ta ajwalil te machʼa lek ya yil stukele”».

Te Jehová la yalbey te Daniel te bin ya skʼan ya yal te wayichile. Kʼalal la yichʼbey swentail Daniel te wayichile, xiw yuʼun. La yal: “Mukʼul ajwalil, jaʼuklaj ya xkʼot ta stojol te akontratak te bin la awil ta awayiche, pero jaʼme ya xkʼot ta atojol. Te mukʼul teʼ te la yichʼ tsʼetel jaʼme akʼoplal. Yame awichʼ lokʼesel ta ajwalil sok yame aweʼ jaʼmal ta lumkʼinal jich bitʼil ya spas te jaʼmal chambalame. Pero te chʼul-abat la yal te yakuk yijkʼitaybeyik schumanteʼel sok yisim te teʼe. Ya skʼan ya yal te yato xchaʼochat ta ajwalil”.

Jun jaʼbil ta patil, te Nabucodonosor yak ta beel ta sba smukʼul na sok kaj yil te lum Babilonia. Jich la yal: “¡Kʼax tʼujbilnax ta ilel te mukʼul lum jpasoje! ¡Maʼyuk machʼa ya spajon!”. Te kʼalal jich yak ta yalel-ae, ay machʼa kʼopoj tal ta chʼulchan te jich la yal: “¡Nabucodonosor! Awichʼbelto lokʼesel ta ajwalil”.

Ta yorail-abi, te Nabucodonosor sojk sjol, och spas sba jich bitʼil te jaʼmal chambalam. Jich yuʼun la slokʼesik ta smukʼul na, bajtʼ ta kuxinel sok te chambalametik ta akiltik. Chʼi bayal te stsotsil sjol te jich kʼot yilel te bitʼil skʼukʼumal xik, jaʼnix jich najtʼub yejkʼach jich bitʼil yejkʼach te jaʼmal mute.

 Kʼalal kʼaxemix jukeb jaʼbil-ae, te Nabucodonosor la snaʼxan kʼinal, jich te Jehová la yotsesxan ta ajwalil ta Babilonia. Jich yuʼun te Nabucodonosor la yal: “Ya kalbey yutsilal te Jehová, te Ajwalil yuʼun chʼulchan. Jaʼ ya skʼexlaltes te machʼatik ya stoy sbaike. Ta ora ini jnaʼojix te jaʼ Ajwalil te Jehovae sok ya xjuʼ ya yakʼbey yaʼtel ta ajwalil te machʼa jich lek ya yil stukele”.