Ason ọvo, Nẹbukadreza da vwerhẹn evwerhẹn ọvo ro muoshọ mamọ. O de se egbaghwanre rọyen, ọ da tanẹ ayen vuẹ oborẹ evwerhẹn na mudiaphiyọ. Ẹkẹvuọvo, ayen sa fan otọ rẹ evwerhẹn na-a. Ukuotọ rọyen, ovie na da ta ota kẹ Daniẹl.

Nẹbukadreza da vuẹ Daniẹl nẹ, ‘Vwevunrẹ evwerhẹn, me da mrẹ urhe ọvo. O gron te odjuvwu. Kohwo kohwo vwẹ akpọ na sa mrẹ. Ẹbe rọyen nabọ vwo erhuvwu, o ji vwo emamọ buebun. Eranvwe rovwonma vwẹ ophie rọyen, ephran je bọn ẹho phiyọ eghọn rọyen. Amakashe ọvo de wontọ nẹ odjuvwu rhe. O de kperi: “She urhe na totọ re wọ nyavwe eghọn rọyen kufia. Ẹkẹvuọvo yan jẹ uchuku rọyen vwo otọ, vwẹ ọghrọrọ rẹ utehru vẹ ẹrovwo vwọ gba. Jẹ iroro rọyen rhẹriẹ nẹ ọ rẹ ohwo, rere a vwẹ iroro rẹ eranvwe kẹ; e jẹ ọ dia ọtiọyen vwẹ ẹgbukpe ighwrẹn. Ihwo na eje ke cha riẹn nẹ Ọghẹnẹ yen Osun, ọ sa vwẹ uvie vwọ kẹ kohwo kohwo rọ guọnọre.”’

Jihova da vuẹ Daniẹl oborẹ evwerhẹn na mudiaphiyọ. Daniẹl vwọ riẹn otọ rẹ evwerhẹn na, oshọ de muo. Ọ da ta: ‘E Ovie, manẹ evwerhẹn nana re shekpahen ivwighrẹn wẹn, ẹkẹvuọvo wẹwẹ yen o shekpahen. Wẹwẹ yen urhe rode re sheri na. A cha reyọ uvie na nẹ abọ wẹn, wọ cha re odi kerẹ eranvwe rẹ aghwa. Jẹ, wọ cha rhoma dia ovie kidie amakashe rẹ Ọghẹnẹ na tare nẹ a yanjẹ uchuku rẹ urhe na vwo.’

Ẹgbukpe ọvo vwọ wan nu, Nẹbukadreza vwọ yan vwẹ enu rẹ ọguan rọyen, ọ da rhe mrẹ erhuvwu rẹ Babilọn. Ọ da ta: ‘Gbe ni orere rode re me bọnre na. Ni obo re me rho te!’ Ọke rọ vwọ ta eta nana, upho ọvo de nẹ odjuvwu rhe rọ tare nẹ, ‘Nẹbukadreza! A reyọ uvie wẹn mie we nure.’

Ugege yena, orhuẹ de fru Nẹbukadreza, ọ da rhe họhọ eranvwe rẹ aghwa. A da djẹ nẹ ọguan rẹ ovie na, eranvwe rẹ aghwa kọyen o nene dia. Ẹto rọyen da rhe dia grongron kerẹ  iphoro rẹ ugo, ififawọ vẹ ififabọ rọyen ke pha kerẹ e rẹ ephran.

Ẹgbukpe ighwrẹn vwọ wan nu, orhuẹ na de nẹ erọ rẹ Nẹbukadreza, Jihova da rhoma vwẹ uvie rẹ Babilọn vwọ kẹ. Nẹbukadreza da ta: ‘Mi jiri Jihova, Ovie rẹ idjuvwu na. Me rhe riẹnre nẹ ọyehẹ Osun. Ọ vwẹ ihwo ri phuoma vwo kpotọ, ọ sa je vwẹ uvie vwọ kẹ kohwo kohwo rọ guọnọre.’