Ohiyu omosa Nabukhodonosori aahiloherya etthu yootikiniha. Owo aahiruma wiitthaniwa asuweli otheene wira emuleele yootaphulela aya. Masi khuuvo aawenrye. Wanikisa waya, mwene aahilavula ni Daniyeli.

Nabukhodonosori aahimuhimeerya Daniyeli wira: ‘Moolohani mwaka, kaahoona mwiri muulupale. Mwiri owo waahinnuwa mpakha ophiya wiirimu. Owo waanooneya elapo yotheene. Makukhu aya yaari ooreera, mihokorokho saya saari sowaatta. lnama saaniphumurya vamuuttutthini vaya, axinuuni yaaniteka ipuru saya mmirittani mwaya. Nto naahirwa nlaikha nikhuwelaka so: “Mwikitthe mwiri uwo, muntakaseke miritta saya. Masi muhiye exa ene ni mitathari saya, etthukiwene n’unyolo wa yuma ni w’eboronze, eriyari y’ematta vamosa ni malaxi. Murim’awe onohiya okhala murima wa mutthu, okhalé murima w’anama. Siso atthu othene esuwele wira Muluku a wirimu onniruma omwene wothene wa mulaponi: Muluku onnavaha omwene ale anatthunawe”’.

Yehova aahimuleela Daniyeli yootaphulela ya oloha wa mwene. Nuumala Daniyeli wiiwexexa yootaphulela aya, owo aahoova. Daniyeli aahimmye so: ‘Khoo mwene, kaaphavela wira oloha nno waamorele awanani anyu. Masi onoohimyani nyeenyu. Mwiri muulupale moonale anyu wiikitthiwe, ti nyuwo. Munimwaakhiwa omwene anyu, ni munimoolyaka malaxi ntoko enama ya mutakhwani. Masi okhala wira nlaikha noohimya wira ehiiweke exa ni mitathaari saya, nto nyuwo munootthikela okhala mwene’.

Nuuvira eyaakha emosa, Nabukhodonosori iira eettaka owannyawe, omuttottopeleka Babilonia. Owo aahimyale so: ‘Mooneke, muttetthe ola woovuwa kitenke aka. Miyo ka mutthu oowerya!’ Okathi ene yoowo, naahiiwanyeya nsu nikhumaka wiirimu, niiraka: ‘Nabukhodonosori! Vano nyuwo muhaakhiwa omwene anyu’.

Okathi ene yoowo, Nabukhodonosori aahivahuwa ni aahikhala ntoko enama ya mutakhwani. Owo aahoomoliwa owannyawe, khiyarowa okhala ni inama sa mutakhwani. Ikharari sawe  saahinnuwa ntoko mapururu a xaaka, makharu awe yaahinnuwa ntoko makarikhwa a mwaapalame.

Nuuvira iyaakha 7, Nabukhodonosori aahikhala saana, nto Yehova aahimuttikiherya okhala mwene a oBabilonia. Nabukhodonosori aahilavula so: ‘Attottopeliwe Yehova, Mwene a wiirimu. Vano koosuwela wira Yehova ti Namalamulela. Owo onnaayeviha atthu aniixinnuuha, ni onnaavaha omwene atthu yaale onaathanla awe’.