Usa ka gab-i, nagkaada hi Nabukodonosor makaharadlok nga inop. Ginpatawag niya an iya maaramon nga mga kalalakin-an basi isumat ha iya an kahulogan hito. Pero waray ha ira nakagsaysay hito. Ha urhi, nakiistorya an hadi kan Daniel.

Hi Nabukodonosor nagsiring: ‘Ha akon inop, may nakita ako nga kahoy. Tinubo ito ngan inabot ha langit an kahitaas. Nakikita ito ha bug-os nga tuna. Mag-opay an dahon hito ngan damu an bunga. An mga hayop napahuway ha landong hito, ngan an mga tamsi naghihimo hin mga salag ha mga sanga hito. Tapos, may anghel nga linusad ha langit. Nagsinggit hiya: “Pudla an kahoy, ngan utda an mga sanga hito. Pero ibilin an tuod, ngan butangi hin puthaw ngan tumbaga an palibot hito. An kasingkasing hito nga kanan tawo sasaliwnan hin kanan hayop, ngan pabay-i nga lumabay hito an pito ka panahon. An ngatanan nga tawo mahibabaro nga an Dios an Magmarando ngan makakaghatag hiya hin ginhadian ha bisan hin-o nga iya karuyag.”’

Iginsumat ni Jehova kan Daniel an kahulogan han inop. Han nasabtan ito ni Daniel, nahadlok hiya. Hiya nagsiring: ‘O hadi, unta ini nga inop mahitungod ha imo mga kaaway, pero mahitungod ini ha imo. Ikaw an daku nga kahoy nga ginpulod. Mawawara ha imo an imo ginhadian, ngan makaon ka hin banwa pariho hin ihalas nga hayop. Pero tungod kay nagsiring an anghel nga ibilin an tuod upod han mga gamot hito, magigin hadi ka utro.’

Paglabay hin usa ka tuig, naglakat-lakat hi Nabukodonosor ha patag nga atop han iya palasyo nga nalilipay pagkinita ha Babilonya. Hiya nagsiring: ‘Kitaa an maopay gud nga syudad nga akon gintukod. Harangdon gud ako!’ Samtang nagyayakan pa hiya, may tingog tikang ha langit nga nagsiring: ‘Nabukodonosor! Yana, ginkuha ha imo an imo ginhadian.’

Hito mismo nga takna, nalurong hi Nabukodonosor ngan nagin sugad hin ihalas nga hayop. Ginpaiwas hiya ha palasyo ngan nagkinabuhi upod han ihalas nga mga hayop. Naghilaba an iya buhok pariho han barahibo han agila, ngan an iya mga kulo nagin pariho hin kanan tamsi.

 Paglabay hin pito ka tuig, nagin normal utro hi Nabukodonosor ngan ginhimo hiya ni Jehova nga hadi han Babilonya. Katapos, hiya nagsiring: ‘Gindadayaw ko hi Jehova, an Hadi han mga langit. Yana, maaram na ako nga hi Jehova an Magmarando. Iya ginpapaubos an mga hambog, ngan makakaghatag hiya hin ginhadian ha bisan hin-o nga iya karuyag.’