Nan̈inofy koa Nebokadnezara, alin̈y araiky zay. Nirahiny nan̈ambara dikany nofy io taminany olo mahay raha jiaby tao, fa tsisy nahay dikany. Farany, nikaiky Daniela izy.

Hoizy tamy Daniela: ‘Nahita kakazo zaho tamy nofinaka. Raha io nahailava nanakatra lan̈itry. Hitanolo jiaby tambony tany izio. Raha io nisy raviny tsara, ndreky nisy voany maro. Nialokaloko tambaninizio iro biby aby io. Iro voron̈o aby io nan̈ano tran̈o tamy sampan̈anany. Nisy anjely baka tandan̈itry tan̈y nivolan̈a mare: “Tapaha kakazo io, baka io rantsàn̈a sampan̈anany. Aza himbotan̈a fo fototronany ndreky vahatranany, baka io fiheza amy vy ndreky varahin̈y. Hiova fôny biby fôny kakazo io, fa tsy fônolombelon̈o eky. Ke fepotoan̈a fito hilanin̈y amy zen̈y. Ho hainolo jiaby amy zen̈y fa Zan̈ahary io Pitondra, ke lan̈iany olo tiany hamian̈a fanjakan̈a hamiany izy.” ’

Nambarany Jehovah Daniela dikany nofy io. Koa fa hainy Daniela nofy io, navozo izy. Volan̈iny: ‘Panjaka, tiako koa tanteraka tamy fahavalonao nofy io, fa izio fo mikasiky anao. Anao kakazo maventy nitapahan̈a io. Adoso aminao fanjakan̈anao, baka io anao hihina bozaka karaha biby. Mbala himpody aminao ndraiky fanjakan̈anao io, fotony anjely io nivolan̈a fa tsy himbotan̈a fototro kakazo io ndreky vahatranany.’

Taon̈o araiky tafara tatỳ, Nebokadnezara nandehandeha tan̈abony tafony lapanany. Izy nivolan̈a: ‘Tsara mare tanàna namboariko ty. Mbala tsisy olo nahavita mira ty!’ Izy mbala nivolan̈a fo, nisy feo baka tandan̈itry tan̈y nivolan̈a: ‘Nebokadnezara! Adoso aminao fanjakan̈anao.’

Nivadiky adala Nebokadnezara, baka io nanjary karaha biby. Tsy maintsy niala tamy lapanany tao izy, baka io niaraka nipetraka tamy biby tan̈atiala. Fan̈evany Nebokadnezara nahailava nira volovolony voromahery, angofonany nira angofony voron̈o.

 Nafaka fito taon̈o, nimpody nisy jery ndraiky Nebokadnezara, baka io izy nataony Jehovah panjakany Babylony. Nebokadnezara amy zay nivolan̈a: ‘Zaho midera Jehovah, Panjakany lan̈itry. Izioty zaho mahay fa Jehovah io Pitondra ankitin̈y. Izy mampiondriky lan̈iany olo man̈ambony ten̈a, baka io amiany fanjakan̈a zay olo tiany hamian̈a izy.’