Junpʼéel áakʼabeʼ Nabucodonosoreʼ tu wayakʼtaj junpʼéel baʼal beet u sajaktal. Tu tʼanaj le máaxoʼob yaan u naʼatoʼob utiaʼal ka aʼalaʼaktiʼ baʼax u kʼáat u yaʼal u wayakʼoʼ, chéen baʼaleʼ mix juntúul béeychaj u tsolik tiʼiʼ. Tu tsʼookeʼ tʼaanaj yéetel Daniel.

Nabucodonosoreʼ tu yaʼalaj tiʼ Daniel: «Tin wayakʼeʼ tin wilaj junkúul cheʼ jach kaʼanchaj ka tak kʼuch teʼ kaʼanoʼ. Ku páajtal kaʼach u yilaʼal jeʼel tuʼuxakeʼ. U leʼobeʼ jach jatsʼutstak yéetel yaʼab u yich. Le baʼalcheʼoboʼ tiʼ ku jeʼeleloʼob yáanal u boʼoyeʼ, yéetel le chʼíichʼoʼoboʼ tiʼ ku beetik u kʼuʼob tu kʼaboʼobeʼ. Tsʼoʼoleʼ éem juntúul ángel teʼ kaʼanoʼ ka tu kʼaʼam aʼalaj: ‹¡Chʼakeʼex le cheʼoʼ yéetel luʼseʼex u kʼaboʼob! Chéen baʼaleʼ pʼateʼex u chuun yéetel u moots. Kʼaxeʼex u baʼpach yéetel hierro bey xan yéetel cobre. Chéen baʼaleʼ u puksiʼikʼal le cheʼoʼ yaan u kʼexpajal. Maʼ kun antal u puksiʼikʼal wíinik tiʼ, baʼaxeʼ u puksiʼikʼal juntúul baʼalcheʼ. Tsʼoʼoleʼ yaan u máan siete tiempos. Tuláakal máax kun tsʼáaik cuenta Dios ku gobernar yéetel jeʼel u páajtal u tsʼáaik le reino tiʼ jeʼel máaxak u kʼáateʼ›».

Jéeobaeʼ tu yaʼalaj tiʼ Daniel baʼax u kʼáat u yaʼal le wayakʼoʼ. Ka tu naʼataj Daniel baʼax u kʼáat u yaʼaleʼ sajakchaji. Letiʼeʼ tu yaʼalaj: ‹Yuum rey, kexiʼ tiʼ a enemigoʼob ka úuchuk le baʼax ta wayakʼtoʼ, baʼaxeʼ tiʼ teech kun úuchul. Teech le kaʼanal cheʼ chʼakaʼaboʼ. Yaan u luʼsaʼaltech le reinooʼ yéetel yaan a jaantik xíiw jeʼex le baʼalcheʼob yaan teʼ kʼáaxoʼ. Chéen baʼaleʼ le angeloʼ tu yaʼalaj ka pʼaʼatak u chuun le cheʼ yéetel u mootsoʼ. Leloʼ u kʼáat u yaʼaleʼ yaan a kaʼa beetik a reyil›.

Ka máan junpʼéel añoeʼ, le táan kaʼach u xíimbal Nabucodonosor tu techoil u palacioeʼ, joʼopʼ u chaʼantik u kaajil Babilonia. Letiʼeʼ tu yaʼalaj: ‹¡Jach táaj nojoch yéetel jatsʼuts le kaaj tsʼoʼok in beetkaʼ! ¡Minaʼan uláakʼ máak jeʼex teneʼ!›. Le jach táan u yaʼalik leloʼ, tu yuʼubaj u yaʼalaʼaltiʼ desde teʼ kaʼanoʼ: ‹¡Nabucodonosor! Tsʼoʼok u luʼsaʼaltech a reino›.

Teʼ súutuk jeʼeloʼ Nabucodonosoreʼ chokochaj u pool ka káaj u tuukul jeʼex juntúul baʼalcheʼeʼ. Le oʼolal jóoʼsaʼab tu palacioeʼ ka kajlaj yéetel le baʼalcheʼob yaan teʼ kʼáaxoʼ. U tsoʼotsel u pooleʼ jach chowakchaj jeʼex u kʼumel juntúul aguilaeʼ, u yíichʼakoʼobeʼ jach chowakchaj jeʼex u yíichʼak juntúul chʼíichʼeʼ.

 Ka máan siete añoseʼ, Nabucodonosoreʼ utschaji. Jéeoba túuneʼ tu kaʼa tsʼáaj u beet u reyil Babilonia. Nabucodonosoreʼ tu yaʼalaj: ‹Kin alabartik Jéeoba, u reyil kaʼan. Letiʼeʼ ku suʼlakkúuntik le máaxoʼob ku taaskubaʼob nojbaʼaliloʼ. Beoraaʼ tsʼoʼok in wilkeʼ Jéeoba ku gobernar yéetel jeʼel u páajtal u tsʼáaik le reino tiʼ jeʼel máaxak u kʼáateʼ›.