I nge kare mo, Belcajar odoko kabaka me Babilon. I dyewor mo acel, en olwongo luditone me awora ma welgi romo alip acel pi karama madit. Ociko luticce ni gukel kikopo jabu ma Nebukadnejar ocoko ki i ot pa Jehovah. Belcajar ki welene gutiyo kwede me mato kongo vino kun gipako lubangegi. Cutcut, cing dano mo onen ci ocako coyo coc i kor ot ma i gang kal pa kabaka.

Lworo ociro Belcajar woko. En olwongo lutyet ma mege ci ocikke botgi ni: ‘Ngat mo ma twero kwano coc man ce gonya te lokke, bibedo laloc me adek i ker me Babilon.’ Gutemo, ento pe gutwero kwano ki gonyo tyen lok me coc magi. Daker odonyo i ot ci otito bot kabaka ni: ‘Tye laco mo ma nyinge Daniel ma onongo yam gonyo lek ki jami matego bot Nebukadnejar. En twero tito tyen lok magi boti.’

Daniel obino i nyim kabaka. Belcajar owaco bote ni: ‘Ka ce itwero kwano coc man dok igonyo te lokke bene, abimiyo boti nyor me jabu dok ibibedo laloc me adek i ker me Babilon.’ Daniel owaco ni: ‘An pe amito motti, ento abigonyo te lokke gire. Woru Nebukadnejar onongo lawaka tutwal, mumiyo Jehovah odwoko rwomme piny. Ingeyo jami ducu mutimme i kome, ento pud pe inyuto woro pi Jehovah kun imato kongo vino ki i kikopo jabu ma kikwanyo ki i ot pa Jehovah. Pi meno, Lubanga ocoyo coc magi ni: Mene, Mene, Tekel, ki Parcin. Tyen lokke tye ni jo Media ki jo Percia gibituro Babilon woko, ci pe ibimedde ki bedo kabaka.’

Boma me Babilon onongo tek ma nen calo pe kitwero turone. Cel matek kacel ki kulu matut onongo orumo boma man woko. Ento i dyewor meno kikome,  jo Medi ki jo Percia gubino ka lweny i kom Babilon. Kabaka Ciro me Percia owiro wi pii me kulu man ci pii odwon woko ma oweko lumonye gungolo kulu ki tyengi wa i dogcel me boma. I kare ma guo kunnu, gunongo dog cel tye twolo! Lumony gudonyo, guturo boma man woko, dok guneko kabaka. Ka dong Ciro odoko kabaka me Babilon.

I nge mwaka acel, Ciro omiyo lok angeya ni: ‘Jehovah ocika ni ager otte ma tye i Jerucalem odoco. Ngat mo keken i kin jone ma mito miyo kony twero cito gire.’ Pi meno, pol pa Lujudaya gudok cen i pacogi i nge mwaka 70 nicakke ma kituro kwede Jerucalem, kit ma Jehovah onongo ocikke kwede kikome. Ciro bene odwoko kikopo ki atabo me jabu ki ryal ma onongo Nebukadnejar okwanyo ki i ot pa Lubanga. Itwero neno kit ma Jehovah otiyo kwede ki Ciro me konyo Jone?