Tiempompejja Belsasaraw Babilonian reyipäjjäna. Mä arumajja, waranqanitakiw mä jachʼa manqʼäwi wakiyäna. Markan wali yäqat jaqenakaruw ukar invittʼäna. Ukatjja Nabucodonosorajj Jerusalén templot apkäna uka qori vasonakwa servirinakapar apsuyanïna. Belsasarampi invitadonakapampejj uka vasonakatwa umapjjäna, diosanakaparuw jachʼañchapjjarakïna. Manqʼapkäna uka utanjja, akatjamatwa mä amparajj uñstäna, jan uñtʼat arunakwa perqar qellqarakïna.

Belsasarajj wal sustjasïna. Magonakapar jawsasajj akham sänwa: ‘Khititejj aka arunakajj kamsañs muni uk qhanañchitani ukarojja, Babilonianjja kimsïr munañani jaqeruw tukuyäjja’ sasa. Magonakapajj taqeniw qhanañchañ yantʼapjjäna, ukampis janiw maynis puedkänti. Reinajj ukhamaruw purinïna, jupasti sarakïnwa: ‘Nabucodonosor awkimatakejj Daniel sat chachaw samkanaksa jan amuytʼkañ arunaksa qhanañchirïna. Jupaw aka arunak qhanañchiristam’ sasa.

Danielajj purïna ukhajja Belsasarajj akham sänwa: ‘Jumatï aka arunak liytʼasin kamsañs muni uk qhanañchitätajja, qori collar churäma, Babiloniansti kimsïr munañani jaqeruw tukuyarakïma’ sasa. Danielajj sänwa: ‘Janiw regalonakam munkti. Ukampis uka arunakajj kamsañsa muni uk qhanañchämawa. Nabucodonosor awkimajj jachʼa jachʼa tukurïnwa, ukatwa Jehová Diosajj humildëñ yatichäna. Kunas jupar pasäna uk sum yatisktajja, ukhampachas janiw Diosar respetktati, templopat apanit qori vasonakapatwa vino umtajja. Ukatwa Diosajj aka arunak qellqe: MENÉ, MENÉ, TEQUEL, PARSÍN. Akasti akham sañ muni: Media, Persia markanakaw Babilonia mark katuntapjjani, jumas janirakiw reyëjjätati’ sasa.

Babilonia markajj jachʼa perqanakampi wali manqha jawirampi muyuntatänwa. Janiw khitis uka markar katuntkaspati sañjamänwa. Ukampis uka arumpachaw medonakampi persanakampejj Babiloniar katuntapjjäna.  Persia markan Ciro sat reyipajja, muytkäna uka jawirwa irpanuküna, ukhamatwa soldadonakajj markan punkupar puripjjäna. ¡Punkojj jistʼaratäskänwa! Ukhamajj jankʼakiw uka mark katuntapjjäna, reyirus jiwayapjjänwa. Ciro reyiw Babilonia mark apnaqjjarakïna.

Janiw maras paskänti, ukhaw Cirojj akham säna: ‘Jehová Diosajja, “Jerusalenankir temploj mayampi saytʼayam” sasaw situ. Ukhamajj yanaptʼañ munirinakajj sarapjjaspawa’ sasa. Jerusalén markajj tʼunjatäkäna ukhatjja 70 maranakaw pasjjäna, waljaniw Jerusalenar kuttʼjjapjjäna. Ukhamatwa Jehová Diosajj promesap phoqäna. Ciro reyejja, kunanaktï Nabucodonosor reyejj templot apkäna ukanaksa qorit qollqet lurat vasonaksa kuttʼayjjänwa. Jehová Diosajj Ciro taypiw markapar yanaptʼäna, ¿uk amuytati?