Mbus ngéda, Bélsasar a bi yila kiñe Babilôn. U wada, a naña ngand, a sébél yom kiki bo hikôô hi bôt bakeñi. A ti bagwélél bé oda le ba lona nye mabôndô ma gôl, ma Nébukadnézar a bi yoñ i témpel Yéhôva. Bélsasar ni bôt bé ba bôdôl nyôl mabôndô ma, ba béghak mop map. Ha nyen kunda yada, woo u mut u pam, u kahal tila bibañga bi hélha i libap li ndap ngand.

Bélsasar a bôdôl sehla ni woñi. A sébél bôt bé ba makañ, a bôn ki bo le: ‘Nu ni nu a ga koblene me bibañga bini, m’a yilha nye ñane nu a nyônôs baa i Babilôn.’ Ba bi heñ, ndi to wada wap a bi la bé kobol bibañga bi. Ha nyen kiñe muda i jôp, i kal nye le: ‘Mut wada ba nsébél le Daniel, a bé béna koblene Nébukadnézar mam. Nyen a nla koblene we bibañga bini.’

Daniel a lo bisu bi kiñe. Bélsasar a kal nye le: ‘Ibale u nla añ ni koblene me bibañga bini, m’a ha we nsañ u gôl i joo, me yilha ki we ñane nu a nyônôs baa i Babilôn.’ Daniel a timbhe nye le: ‘Tééda makébla moñ, ndi m’a kal we kii bibañga bini bi nkobla. Isoñ Nébukadnézar a bé humbul nyuu, ndi Yéhôva a suhus nye. U nyi mam momasôna ma bi pémél nye, ndi we, u nti bé Yéhôva lipém ngéda u nyôl wai mu mabôndô ma gôl ma témpel Yé. Jon, Djob a ntila bibañga bini le: Mené, Mené, Tekél, ni Perés. Bibañga bini bi nkobla le bôt ba Média ni ba Persia b’a kadal Babilôn i moo moñ, ni le w’a ba ha bé ki kiñe.’

Babilôn a bé nene, i bitéé bi mis, le mut a bé bé le a yémbél nye. Tison ini i bé nkéñék ni basoso ba mapénd, yak ni lom nkeñi. Ndi, nlélém u u nyen bôt ba Média ni ba Persia ba bi leñ bo gwét. Kiñe Persia  le Kirus, a bi boñ le lom a noñ njel ipe kayéle bisônda gwé bi la yap lom ni makôô, inyu pam bisu bi manwemel ma tison. Kiki ba mbol ha, ba ada le manwemel ma néhi! Ba jôp ngwéé ni ngwéé, ba kadal tison, ba nol ki kiñe. Ha nyen Kirus a yila ñane Babilôn.

Nwii u, Kirus a legel le: ‘Yéhôva a nkal me le me témb me oñ témpel yé i Yérusalem. Ikété litén jé, nu ni nu a gwé ngôñ i hôla maoñ a yé kunde i ke.’ Jon, kiki Yéhôva a bi bôn, ngandak bon ba Lôk Yuda i bi témb, 70 ma nwii mbus tjiba i Yérusalem. Kirus a timbis mabôndô ma gôl ni ma silba, ni bisélél bipe, bi Nébukadnézar a bi yoñ i témpel. Baa u ntehe lelaa Yéhôva a bi gwélél Kirus inyu hôla litén Jé?