Adong ma sahalak raja ni Babel na margoar si Beltsasar. Diundang ibana ma angka pejabat marpesta. Disuru ma angka naposona mambuat angka mangkuk mas na dibuat si Nebukadnesar sian bagas joro ni Jahowa. Sian angka mangkuk i do si Beltsasar dohot tamuna minum. Dipuji-puji nasida do debata ni nasida. Tompu ma adong sada tangan manurat di dinding ni istana i. Jala ndang adong na mamboto lapatan ni hata i.

Mabiar ma si Beltsasar. Dijou ma angka halak na malo. Marjanji ma ibana tu nasida, ‘Molo boi do dipatorang hamu hata on, gabe halak na marhuaso patoluhon ma hamu di Babel on.’ Berupaya do nasida patorangkon, alai ndang adong na boi. Dung i didok omakna ma tu ibana, ‘Adong do sahalak baoa na margoar si Daniel. Hea do ibana mangurupi si Nebukadnesar. Jala boi do ibana patorangkon hata on.’

Ro ma si Daniel manjumpangi raja. Didok si Beltsasar ma, ‘Molo boi dipatorang ho artina, hulehon ma tu ho kalung mas jala ho ma halak na patoluhon na marhuaso di Babel.’ Dialusi si Daniel ma, ‘Mauliate ma raja, unang pola lehon i tu ahu. Hupaboa pe tu ho arti ni hata i. Ginjang do roha ni bapakmu si Nebukadnesar. Alani i, gabe dipatutoru Jahowa ibana. Tangkas do i diboto ho. Alai ndang dipatudu ho pangargaion tu Jahowa. Minum do ho sian angka mangkuk mas on na dibuat sian bagas joro ni Jahowa. I do alana disurathon Debata hata on: Mene, Mene, Tekel, Uparsin. Artina, taluhonon ni Madai dohot Persia ma Babel. Jala ho pe ndang raja be.’

Hira na so adong do na boi manaluhon Babel. Hapal jala timbo do tembokna. Jala dihaliangi sunge na bagas do kota i. Alai di borngin i, ro ma  halak Madai dohot Persia menyerang nasida. Dipapinda si Sirus Raja Persia do dalan ni aek di sunge i. Gabe boi ma angka tentarana masuk tu gerbang kota. Bungka do dapot ni nasida gerbang i! Pintor masuk nasida, ditaluhon ma kota i jala dibunu ma si Beltsasar. Gabe si Sirus ma na mangarajai Babel.

Taon na mangihut, dibahen si Sirus ma boa-boa, ‘Nunga didok Jahowa tu ahu asa dipadenggan muse bagas jorona di Jerusalem. Hamu angka bangsona, laho ma hamu paturehon i.’ Songon na dijanjihon Jahowa, godang do halak Jahudi na mulak tu Jerusalem dungkon 70 taon. Dipaulak si Sirus do muse mangkuk mas dohot perak na dibuat si Nebukadnesar sian bagas joro. Diparrohahon ho do songon dia Jahowa mamangke si Sirus mangurupi bangsona?