Pag-abot nin panahon, nagin hadi kan Babilonya si Belsasar. Sarong banggi, inimbitaran niya sa handaan an sangribo sa pinakaimportanteng mga tawo sa Babilonya. Ipinaluwas niya sa mga suruguon an bulawan na mga kopa na kinua ni Nabucodonosor sa templo ni Jehova. Ginamit iyan ni Belsasar saka kan mga bisita niya asin inumaw ninda an saindang mga diyos. Bigla na sana, may naglataw na sarong kamot nin tawo na nagsurat nin dai maintindihan na mga tataramon sa lanob kan kakanan sa palasyo.

Takuton si Belsasar. Ipinaapod niya an mga salamangkero asin pinangakuan: ‘An siisay man na makapaliwanag kan mga tataramon na iyan, gigibuhon kong ikatulo sa pinakamakapangyarihan na tawo sa Babilonya.’ Naghinguwa sinda, pero mayo saindang makapaliwanag kaiyan. Dangan naglaog an reyna asin nagsabi: ‘Kaidto, an lalaking si Daniel an nagpapaliwanag ki Nabucodonosor kan mga bagay-bagay. Maipapaliwanag niya an mga tataramon na iyan sa saimo.’

Nagduman si Daniel sa hadi. Sinabi saiya ni Belsasar: ‘Pag nabasa mo asin naipaliwanag an mga tataramon na iyan, tatawan taka nin bulawan na kuwintas asin gigibuhon takang ikatulo sa pinakamakapangyarihan sa Babilonya.’ Nagsabi si Daniel: ‘Dai ko kaipuhan an mga regalo mo, pero sasabihon ko saimo an kahulugan kan mga tataramon na iyan. Mahambog an ama mong si Nabucodonosor kaya ibinaba siya ni Jehova. Aram mo an gabos na nangyari saiya, pero dai mo iginalang si Jehova. Ininuman mo pa su mga bulawan na kopang hali sa templo ni Jehova. Kaya ipinasurat nin Diyos an mga tataramon na iyan: Mene, Mene, Tekel, asin Parsin. Buot sabihon, sasakupon kan mga Medo asin Persiano an Babilonya, asin dai ka na magigin hadi.’

Garo baga warang makakasakop sa Babilonya. Protektado an siyudad na ini nin mahibog na mga lanob asin hararom na salog. Pero kan mismong bangging idto, nagsalakay an mga Medo asin Persiano. Para maghababaw an salog, pinabulos iyan sa ibang direksiyon kan hadi kan  Persia na si Ciro. Dahil digdi, nakalakaw an mga suldados niya pabalyo sagkod sa trangkahan kan siyudad. Pag-abot duman, bukas an trangkahan! Suminalakay an hukbo, sinakop an siyudad, asin ginadan an hadi. Dangan si Ciro na an nagin tagapamahala kan Babilonya.

Dai naglihis an sarong taon, ipinaisi ni Ciro: ‘Sinabi sako ni Jehova na itugdok giraray an saiyang templo sa Jerusalem. An siisay man sa mga lingkod niya na gustong tumabang, puwedeng magduman.’ Kaya arog kan ipinangako ni Jehova, dakul na Judio an nagbalik sa nasyon ninda pakalihis nin 70 taon pakatapos na gabaon an Jerusalem. Ipinabalik ni Ciro an mga kopang bulawan saka plata * asin an mga kagamitan na kinurua ni Nabucodonosor sa templo. Nahiling mo kun paano ginamit ni Jehova si Ciro para tabangan an Saiyang mga lingkod?