Mu kuya kwa nshita, Belshasari e waishileba imfumu ya bena Babiloni. Bushiku bumo mu nshita ya bushiku aitile abantu abengi abacindama sana ku mutebeto. E ico aebele ababomfi bakwe ukuleta amakapu ya golde ayo Nebukadnesari asendele mwi tempele lya kwa Yehova. Belshasari na bo aitile ku mutebeto babomfeshe aya makapu ukunwenamo uku ninshi baletasha na balesa wabo. Apo pene fye, kwamoneke ukuboko kwa mwaume kabili kwatendeke ukulemba pa cibumba ca mu muputule balelila. Imfumu tayaishibe umo amashiwi ukuboko kwalembele yalolele.

Belshasari alyumfwile umwenso. E ico aitile abamajiki kabili abebele ati: ‘Onse uwalalondolola aya mashiwi, nkamulenga akabe kateka wa butatu mu Babiloni.’ Lelo bonse balifililwe ukulondolola umo amashiwi yalolele. Lyena namfumu aingile umo bali no kusosa ati: ‘Kwaliba umwaume umo uwalelondolwela Nebukadnesari ifintu, ishina lyakwe ni Daniele. Kuti amulondolwela umo aya mashiwi yalolele.’

Daniele alingiile umwali imfumu. Lyena Belshasari amwebele ati: ‘Nga walabelenga aya mashiwi no kuyalondolola, nalakupeela akakufwala mu mukoshi aka golde kabili walaba kateka wa butatu mu Babiloni.’ Lelo Daniele amwebele ati: ‘Nshilefwaya ukuti mumpeele ubupe, lelo nalamweba umo aya mashiwi yalolele. Shinwe Nebukadnesari, ali uwa cilumba lelo Yehova alimucefeshe. Mwalishiba ifyamucitikiile, nomba tamucindike Yehova pantu mwanwena umwangashi mu makapu ya golde ayo basendele mwi tempele lya kwa Yehova. E cilengele ukuti Lesa alembe aya amashiwi: Menee, Menee, Tekeele, na Parsiini. Aya mashiwi yalolele mu kuti abena Medai na bena Persia bakacimfya Babiloni, kabili bakamupoka ubufumu.’

Abantu balemona kwati te kuti kube nangu umo uwingacimfya Babiloni. Uyu musumba wali mwilinga ilikalamba kabili mu mbali ya musumba mwali umumana  uwashika. Na lyo line, pali bulya bwine bushiku mu nshita ya bushiku, abena Medai na bena Persia balisanshile umusumba. Sailasi, imfumu ya bena Persia apatwile umumana pa kuti abashilika bakwe bafike pa mpongolo ya musumba. Ilyo bafikile pa mpongolo, basangile ifiibi tafikomenwe! Aba abashilika balingiile mu musumba no kucimfya abena Babiloni kabili balipeye ne mfumu. Pa numa Sailasi e waishileba kateka mu Babiloni.

No mwaka tawapwile, Sailasi abilishe ati: ‘Yehova nanjeba ukuti imukuulile cipya cipya itempele lyakwe mu Yerusalemu. Abantu bakwe abalefwaya ukubombako uyu mulimo kuti baya.’ Nga filya fine Yehova alaile, abaYuda abengi balibwelelemo ku Yerusalemu pa numa ya myaka 70 ukutula apo uyu umusumba waonawililwe. Sailasi alibwekeshemo amakapu ya golde na silfere e lyo ne fipe fimbi ifyo Nebukadnesari asendele mwi tempele. Bushe wamona ifyo Yehova abomfeshe Sailasi ku kwafwa abantu bakwe?