Biaen, Belsasa i kam king blong Babilon. Wan naet, hem i mekem wan bigfala lafet, mo i singaot wan taosen haeman oli kam. Hem i talem long ol man blong hem blong oli go tekem ol kap we oli wokem long gol, we Nebukadnesa i bin tekemaot long haos blong Jehova. Belsasa mo ol haeman ya oli yusum ol kap ya blong dring waen, mo oli presem ol god blong olgeta. Nao wantaem nomo, wan han blong man i kamaot, i raet long wol blong haos, be ol tok we hem i raetem oli narakaen.

Belsasa i fraet tumas, nao i singaot ol man blong mekem majik, mo i promes long olgeta se: ‘Man we i talemaot mining blong tok ya, bae mi putumap hem i kam namba tri haeman long Babilon.’ Be i no gat wan long olgeta we i save talemaot mining blong tok ya. Nao kwin i kam talem se: ‘I gat wan man, nem blong hem Daniel, we bifo, hem i talem mining blong ol samting long Nebukadnesa. Hem nao i save talem mining blong ol tok ya.’

Daniel i kam luk Belsasa, nao king i talem se: ‘Sipos yu save ridim mo eksplenem tok ya, bae mi givim wan jen long yu we oli wokem long gol, mo bae mi putumap yu yu kam namba tri haeman long Babilon.’ Daniel i talem se: ‘Mi no wantem ol presen ya, be bae mi talem mining blong ol tok ya. Papa blong yu, Nebukadnesa, i flas tumas, nao Jehova i daonem flas blong hem. Yu save finis evri samting we i hapen long hem, be yu stronghed yet. Yu girap yu yusum ol kap blong haos blong God blong dring waen. Yu no gat respek nating long Jehova. Taswe hem i raetem tok ya: Mene, Mene, Tekel, mo Pasin. Mining blong tok ya se ol ami blong Media mo Pesia bae oli winim Babilon, mo yu bae yu no moa king.’

Ol man oli ting se i no gat wan ami we i naf blong winim Babilon. Ol bigfala stonwol oli raonem taon ya, mo wota blong wan bigfala reva i ron i goraon long hem. Nating se i olsem, long sem naet  nomo, ol ami blong Media mo Pesia oli kam agensem Babilon. King Sirus blong Pesia i blokem reva mo i mekem i ron long wan narafala rod. Nao ol soldia oli krosem, mo oli go stret insaed long taon ya, from we long naet ya, ol bigfala doa oli open nomo i stap. Oli winim taon ya, oli kilim king i ded, nao Sirus i rulum Babilon.

Bifo we wan yia i pas, Sirus i talem se: ‘Jehova i talem long mi blong mi wokem bakegen haos blong hem long Jerusalem. Ol man blong hem we oli wantem go mekem wok ya, oli save go.’ Ale, 70 yia afta we ol ami oli spolem Jerusalem, plante man Jiu oli gohom, olsem Jehova i promes finis. Sirus i sanembak ol kap we oli wokem long gol mo silva mo ol narafala samting we Nebukadnesa i karemaot long haos blong God. ?Yu yu luk olsem wanem Jehova i yusum Sirus blong i givhan long ol man blong hem?