Si Belsazar ang sunod nga naghari sa Babilonya. Usa ka gabii niana, giimbitar niya sa usa ka pista ang usa ka libo ka iladong tawo. Iyang gisugo ang iyang mga sulugoon nga gamiton ang mga kopa nga bulawan nga gikuha ni Nabucodonosor sa templo ni Jehova. Si Belsazar ug iyang mga bisita nag-inom ug nagdayeg sa ilang mga diyos. Dayon kalit silang nakakitag kamot diha sa bungbong, ug may gisulat kini nga dili masabtan.

Puwerteng hadloka ni Belsazar. Iyang gipatawag ug giingnan ang mga madyikero: ‘Kon kinsay makapatin-aw niining mga pulonga, himoon nako siyang ikatulo sa pinakataas ug posisyon sa Babilonya.’ Ilang gisulayan pero walay makapatin-aw. Dayon misulod ang rayna ug miingon: ‘Naay tawo nga ginganlag Daniel nga maoy nagpatin-aw sa mga damgo ni Nabucodonosor. Mapatin-aw niya ning mga pulonga.’

Miadto si Daniel sa hari. Si Belsazar miingon niya: ‘Kon mabasa ug mapatin-aw nimo ning mga pulonga, hatagan ti kag bulawan nga kuwentas ug himoon ka nako nga ikatulo sa pinakataas ug posisyon sa Babilonya.’ Mitubag si Daniel: ‘Wala ko magkinahanglan sa imong ihatag, pero sultian ti ka sa kahulogan niining mga pulonga. Hambogiro ang imong amahan nga si Nabucodonosor maong gibadlong siya ni Jehova. Nahibalo ka sa tanang nahitabo niya, pero wala nimo tahora si Jehova kay gigamit nimo ang bulawang mga kopa gikan sa Iyang templo. Maong gisulat sa Diyos kining mga pulonga: Mene, Mene, Tekel, ug Parsin. Kana nagpasabot nga pildihon sa mga Medianhon ug Persianhon ang Babilonya, ug dili na ka maghari.’

Morag dili mapildi ang Babilonya kay napalibotan kinig bagang mga pader ug lalom nga suba. Pero niadtong gabhiona, misulong ang mga Medianhon  ug Persianhon. Gipatipas sa Persianhong hari nga si Ciro ang suba aron makaduol ang mga sundalo sa ganghaan sa siyudad. Pag-abot nila didto, abli ang ganghaan! Misulod sila, gipildi ang siyudad, ug gipatay ang hari. Dayon si Ciro ang nahimong lider sa Babilonya.

Wala pay usa ka tuig, si Ciro miingon: ‘Gisugo ko ni Jehova nga tukoron pag-usab ang templo sa Jerusalem. Kadtong gustong motabang puwede nang mouli.’ Busa natuman gyod ang gisaad ni Jehova. Daghang Hudiyo ang namalik paglabay sa 70 ka tuig human malumpag ang Jerusalem. Giuli ni Ciro ang bulawan ug silver nga mga kopa ug mga gamit nga gikuha ni Nabucodonosor sa templo. Imo bang namatikdan kon giunsa paggamit ni Jehova si Ciro aron tabangan ang Iyang katawhan?