Wagati dɔ nana se, Balitazari kɛra Babilonɛ masacɛ ye. Loon dɔ sufɛ, a ye jamana mɔgɔba waa kelen weele dumuniba dɔ la. A y’a ɲini a ka baaradenw fɛ u ka na ni jifilen sanulamanw ye Nebukadnezar ye minw ta Jehova batosoba kɔnɔ. Balitazari n’a ka jama ye minni kɛ n’o jifilenw ye ani u y’u ka alaw tando. Bolo dɔ barila ka bɔ ani k’a daminɛ ka kumaden lɔnbali dɔw sɛbɛ dumuni kɛyɔrɔ kogo kan.

Balitazari jaa tigɛra. A ye a ka jinamoriw weele k’a daa di u ma ko: ‘Ni min sera ka kumaden nunu kɔrɔ fɔ, ne bena o tigi kɛ Babilonɛ jamana mɔgɔba sabanan ye.’ U y’a ɲini k’o kumadenw kɔrɔ fɔ, nka u si ma se. O kɔ, masacɛ bamuso donna dumuni kɛyɔrɔ la, ani a ko: ‘Cɛɛ dɔ be yen min tɔgɔ ko Daniyɛli. A tun be deli ka koow kɔrɔ fɔ Nebukadnezar ye. A be se k’o kumadenw kɔrɔ fɔ i ye.’

Daniyɛli donna masacɛ fɛ. Balitazari y’a fɔ a ye ko: ‘N’i sera ka kumaden nunu kalan ani k’u kɔrɔ fɔ, ne bena sɛni sanulaman don i kaan na, k’i kɛ Babilonɛ jamana mɔgɔba sabanan ye.’ Daniyɛli y’a jaabi ko: ‘Ne t’i ka kadow fɛ, nka ne bena o kumadenw kɔrɔ fɔ i ye. I faa Nebukadnezar tun ye kuncɛba ye, o kama Jehova y’a majigi. Koo minw bɛɛ y’a sɔrɔ, i b’o kala ma. O bɛɛ n’a ta, i ye diwɛn min ni Jehova ka jifilen sanulamanw ye minw tun be Alabatosoba kɔnɔ. O cogo la, i ye Jehova dɔgɔya. O kama le Ala ye kumaden nunu sɛbɛ: Menɛ, Menɛ, Tekɛli, Parisin. O kumadenw kɔrɔ ko Mɛdiw ni Pɛrɛsikaw bena Babilonɛ minɛ ani i tɛna kɛ masa ye tugun.’

A tun be komi jamana si tun tɛ se ka Babilonɛ dugu minɛ. Kogo barikamanw ni baji dunba dɔ tun b’o dugu latanga. Nka o loon suu bɛɛ la, Mɛdiw ni Pɛrɛsikaw nana Babilonɛ kama. Pɛrɛsikaw ka masacɛ Sirusi ye jii  sira yɛlɛma walisa a ka sɔrɔdasiw ka se ka tagama fɔɔ ka se Babilonɛ dugu dondaw la. U sera k’a ye ko daaw yɛlɛnin lo! Sɔrɔdasiw donna ka dugu minɛ ani ka masacɛ faga. O kɔ, Sirusi kɛra masa ye Babilonɛ kun na.

O saan na, Sirusi ye cii nin lase: ‘Jehova y’a fɔ ne ye ko n’ k’a kɛ Alabatosoba ka lɔ kokura Zeruzalɛmu. A ka mɔgɔ minw bɛɛ b’a fɛ ka dɛmɛ don o la, u be se ka taga.’ Ka kɛɲɛ ni Jehova ka layidu ye, saan 70 Zeruzalɛmu halakinin kɔ, Yahutu caaman kɔsegira u faso la. Nebukadnezar tun ye jifilen sanulamanw ni warigwɛlaman minw ta ani a tun ye minan minw ta Alabatosoba kɔnɔ, Sirusi y’o bɛɛ kɔsegi. I y’a ye Jehova y’a ka mɔgɔw dɛmɛ Sirusi sababu fɛ cogo min na wa?