Nüikalaaka mapa Belsasar sünain aluwatawaa saaʼu Babilonia. Soʼu wanee ai, eejatü wanee ekawaa nutuma napüla miit wayuu. Yalajana jutkatüin na wayuu kojutukana maʼin atumawaa. Nuluwataaka Belsasar na aʼyataaliikana nümüin süpüla nayuʼluinjatüin tü iitairua aainjuushikat süka ooro, tü nülüʼüjakat Nabucodonosor suluʼujee tü piichi aʼwaajüleekat Jeʼwaa. Nüsiasü Belsasar tia iitakalüirua otta na yalajanakana jutkatüin nümaa. Noʼttaka sünain aʼwaajaa namaleiwase. Eejaʼalaa sümaka najapü wanee wayuu sünain ashajaa pienchisü pütchi sünain süsepü tü piichikat.

Ayoʼujaasü maʼin naaʼin Belsasar sutuma tia. Neenajitka na ooʼulaküliikana, nümaka namüin: «Chi eekai nüküjain tamüin jamaluʼuluin pütchikat tüüirua, laülaajeechi nia tatuma saaʼu wainma kasa yaa Babilonia». Nooʼulakaka nachajaain sukuwaʼipa süpüla natüjaain saaʼu jamaluʼuluin tü pienchisükat pütchi, isapejeʼe shia nachiki. «Eeshi wanee wayuu kanüliakai Daniel, nüküjapuʼuin nümüin Nabucodonosor jamaluʼuluin nüʼlapüin. Eesü süpüla nüküjain Daniel pümüin jamaluʼuluin türa pienchisükat pütchi», sümaka tü aluwataasükat nümüin Belsasar.

Nuʼunaka Daniel eemüin chi aluwataaikai. «Pütüjale süpüleerua paashajeʼerüin jee püküjain jamaluʼuluin pütchikat tüüirua, taapeerü pümüin wanee aüliijanaa ooro otta teʼitaajeechi pia süpüla puluwataain saaʼu wainma kasa yaa Babilonia», nümaka Belsasar nümüin Daniel. Nusoutaka Daniel nümüin: «Nnojotsü keeʼireein taaʼin tü püsülajeekat tamüin. Taküjeerü neʼe pümüin jamaluʼuluin pütchikat tüüirua. Yaletapuʼu aaʼinchi Nabucodonosor chi püshikai, jee eʼrüshi nia japülii nutuma Jeʼwaa. Pütüjaa aaʼu tü alatakat nümüin chi püshikai, ayatapejeʼe mojutuin pümüin Jeʼwaa. Püsiasü wiino tü iitakalüirua suluʼujeejatkat tü piichi aʼwaajüleekat Maleiwa. Sünainjee tia, nüshajirüin Maleiwa pütchikat tüü: mené, mené, tequel otta parsín. Tia pütchikalüirua maluʼulu, ashuteenain na meedokana otta na persakana saaʼu Babilonia. Nnojoleechika pia aluwataain püchikuaʼa».

 Süka miyoʼuin süsepü Babilonia otta süka eein wanee süchi alataka pasanainpünaa sünain, kapüleesü ashutaa saaʼu. Ashutuna aaʼu natuma na meedokana otta na persakana soʼuleʼeya aikat tia. Chi aluwataaikai Ciro, nujunujeʼerüin tü süchikat süpüla nantüinjanain na nusurulaatsekana suluʼumüin tü pueulokot. Nantapa soʼuluʼumüin tü puettoʼukot, jutatüsü napüla. Nekerotoko otta nashutaka saaʼu. Oʼutuna aaʼinchi chi aluwataakai saaʼu Babilonia. Niakalaka Ciro aluwataain saaʼu Babilonia.

Waneepa juya Ciro sünain aluwatawaa, müsü nünüiki: «Nuluwataain taya Jeʼwaa süpüla takumajirüin tü aʼwaajüleekat chaa Jerusalén. Chi judío eekai nükaaliinjeein, eeshi süpüla nuʼunüin». Wainma na judío aleʼejakana noumainpaʼamüin sülatapa 70 juya süchikijee sajaʼttinnüin Jerusalén. Mayaa, ekeraajüsü tü nümakat Jeʼwaa paala. Nüleʼejirüin Ciro süchikuaʼa tü iitairua aainjuushikat süka ooro, pülaata otta tü kasairua nülüʼüjakat paala Nabucodonosor suluʼujee tü piichi aʼwaajüleekat Jeʼwaa. ¿Aashin nüneekünüin Ciro nutuma Jeʼwaa süpüla nükaaliinjain nupueulose?