Kon el tiémpo, Belsasar ogoverna Babilóniape. Peteĩ pyhare ojapo peteĩ vankéte ha oinvita mil persóna iñimportantevévape upe paíspe. Haʼe omanda umi isirviéntepe oguenohẽ hag̃ua umi váso de óro Nabucodonosor ogueraha vaʼekue Jehová témplogui. Belsasar ha iñinvitadokuéra oipuru umi váso hoʼu hag̃ua víno ha oalava hikuái umi dios fálsope. Upeichaháguinte pe lugár ojejapohápe pe vankéte ojekuaa peteĩ kuimbaʼe po oskrivíva pe parére ha avavénte nontendéi mbaʼépa heʼise umi mbaʼe oskrivíva.

Belsasar tuichaiterei oñemondýi. Upémarõ ohenói umi mágope ha heʼi: “Oĩramo pende apytépe omombeʼúva chéve mbaʼépa heʼise koʼã mbaʼe, oikóta chugui pe tercera persóna iñimportantevéva Babilóniape”. Enterovénte oñehaʼã ontende hag̃ua mbaʼépa heʼise umi palávra ojeskrivi vaʼekue pe parére, péro ndaikatúi oexplika hikuái. Upéi og̃uahẽ pe rréina ha heʼi: “Peteĩ kuimbaʼe hérava Daniel oexplikámi vaʼekue Nabucodonosórpe mbaʼépa osignifika koʼãichagua mbaʼe. Haʼe heʼíta ndéve mbaʼépa osignifika koʼã palávra”.

Daniel oho Belsasar rendápe ha og̃uahẽvo upépe, pe rréi heʼi chupe: “Ikatúramo elee ha eexplika chéve mbaʼépa heʼise koʼã palávra, ameʼẽta ndéve peteĩ kollár de óro ha ajapóta ndehegui pe tercer kuimbaʼe iñimportantevéva Babilóniape”. Daniel heʼi chupe: “Haʼéta ndéve mbaʼépa heʼise koʼã palávra, péro natekotevẽi remeʼẽ chéve ni peteĩ rregálo. Nde túa Nabucodonosor ningo ijorgullosoiterei vaʼekue ha Jehová okorrehi chupe upévare. Ha nde reikuaáramo jepe umi mbaʼe oiko vaʼekue hese, lomímonte ndererrespetái Jehovápe. Nde reipuru umi váso de óro ojegueru vaʼekue Jehová témplogui reʼu hag̃ua víno, upévare Ñandejára oskrivi pe parére koʼã palávra: mené, mené, tequel ha parsín. Koʼã palávra heʼise umi medo ha umi persa ojagarrataha Babilonia ha nde ndahaʼemoʼãvéima rréi”.

Babilonia ningo imurallapa ha ojere vaʼekue hese peteĩ rrío ipypukúva. Upévare hasy voi jarovia hag̃ua oĩne hag̃ua ojagarráva upe siuda. Péro  upe pyharépe umi medo ha persa oatakáma Babilonia. Pe rréi persa hérava Ciro ombodesvia pe rrío ikatu hag̃uáicha ijehérsito okrusa pe siuda entráda oĩha gotyo. Umi soldádo og̃uahẽvo pe siuda rokẽme, otopa ojeheja hague nandi pe okẽ ha oike ojagarra hikuái pe siuda ha ojuka pe rréipe. Upéi Ciro oñepyrũ ogoverna Babilóniape.

Upe áño oñepyrũ haguépe ogoverna, Ciro heʼi: “Jehová heʼi chéve amyatyrõ hag̃ua itémplo oĩva Jerusalénpe. Entéro umi judío oipytyvõséva ojejapo hag̃ua upéva ikatu oho”. Upéicha rupi, 70 áño oñehundi haguépe Jerusalén, heta judío oho jey vaʼekue upépe. Péicha oñekumpli Jehová opromete vaʼekue chupekuéra. Ciro oguerahaukapa jey avei Jehová témplope umi váso de óro ha de pláta ha umi ótra kósa Nabucodonosor ogueru vaʼekue upégui. ¿Ehechakuaápa mbaʼéichapa Jehová oipuru vaʼekue Círope oipytyvõ hag̃ua ipuévlope?