Kä nikani ta angwane, Belsasar namani reire kä Babilonia yekänti. Bati deu, mrö sribebare krubäte kwe nitre kwati kräke. Ye abokän nitre bäri ütiäte juta yete. Vaso orore Jehovakwe nämene templote abokän Nabucodonosor nikani ngwena ye nitre sribikä kwe ye rabadre den niebare kwe ietre. Belsasar aune nitre nübaibare kwe ye käkwe tomana ñani vaso yete aune namanintre ngöbö keta kabre kwetre ye käi ngwen juto jabätä. Bati, ni kise jutuabare ietre tärä okwä tike kibätä niaratre nämene mröre aune tomana ñain yekänti.

Belsasar yebätä kä jürä namani krubäte. Nitre ja di käräkä choka ie ye käräbare kwe aune käbämikani kwe ietre: ‘Nirekwe tärä okwä ye dre gärätä ye mikai gare tie ye tikwe mikai ni nimäkäre bäri ütiäte kä Babilonia nekänti’. Yebätä, nitre ye ja di ngwani akwa tärä okwä ye nämene dre mike gare ye ñaka nükani gare ietre. Angwane reina nükani aune niebare kwe ie: ‘Nabucodonosor nämene köböre aune kukwe ñaka nuäre rükadre gare ye ni kädekata Daniel nämene mike gare ie. Tärä okwä ye dre gärätä niara raba mike gare mäi’.

Daniel nikani rei känti. Niara namani yete angwane Belsasar niebare ie: ‘Tärä okwä yebätä mä raba ñäke aune ye dre gärätä ye mä mikai gare tie angwane, tikwe collar orore biain mäi aune tikwe mä mikai ni nimäkäre bäri ütiäte kä Babilonia nekänti’. Daniel niebare ie: ‘Ti ñaka tö jondron ie. Akwa tärä okwä ye dre gärätä ye ti raba mike gare mäi. Mä rün, Nabucodonosor nämene bike kri aune niara rabadre ja töi mike bobre ye Jehovakwe driebare ie ja töi kräke. Dre namani bare niarabätä ye gare jökrä mäi akwa yebiti ta mäkwe ñaka Jehová mikani ütiäte jai. Vaso orore kwe abokän nämene templote te mätä vino ñain. Aisete Ngöbökwe tärä okwä ne tiri: MENÉ, MENÉ, TEQUEL AUNE PARSÍN. Tärä okwä ye tä mike gare nitre medo aune persa käkwe Babilonia diain jai aune mä ñaka rabaira reire’.

Babilonia diandre jai ye ñaka nämene tuin nuäre. Ki mente  kwin aune ñö kri nämene juta ye kriemike. Akwa köbö ye arabe te deu, nitre medo aune persa käkwe juta Babilonia diani jai. Ciro, rei persa käkwe ñö ye jie tikaninte kä madabiti ta ne kwe nitre rükä ye rabadre nemen jukwe nämene mikani jutabiti yekänti. Niaratre namani yete angwane, ¡jukwe nämene tikani! Nitre rükä ye jötrö ngwarbe juta ye diani jai aune rei ye murie ketani kwetre arato. Angwane, Ciro namani gobrane Babilonia mada.

Ciro gobranbare kä kwati te ye ngwane, kukwe mikani gare kwe: ‘Munkwe templo Jerusalén ükadreteta nini Jehovakwe tie. Nitre judío meden törba sribi ye nuain siba raba niken’. Jehová käbämikani ye erere kä 70 nikani ta ye bitikäre, nitre judío kwati krubäte nikaninta ja käite Jerusalén. Ne madakäre, vaso orore aune jondron ngwiane ye bianinta niaratre ie aune jondron mada mada nämene templote Nabucodonosor nikani ngwena ye bianinta kwe arato. ¿Jehovakwe Ciro mikani juta kwe dimike ño ye jutuani mäi?