Korusenina, Beltsasar ongwa rira ombara yaBabilon. Ouṱuku umwe, eye wa ṋanga ovandu ovengi ovananḓengu mehi komukandi. Eye wa rakiza kutja ovakarere ve, ve ete omakopi wongoldo Nebukadnesar nga toora okuza mondjuwo ondjapuke yaJehova. Beltsasar novayenda ve va nwina momakopi nga nu ave tanga oomukuru wawo. Tjimanga otji pa munika eke romundu, noro ra uta okutjanga omambo nge ha tjiukwa komira yetuwo romariro.

Beltsasar wa urumine tjinene. Eye wa isana ozombetere ze, ne ze kwizikire a tja: ‘Ngamwa auhe ngu ma kahurura omatjangwa nga, ami me mu tjiti kutja ma rire omunane outjatatu moBabilon.’ Owo otji va kondja okukahurura omaheero womambo ngo, posiya kapena umwe ngwaa yenene. Ombara oserekaze ya hita nai tja: ‘Pe nomurumendu wena Daniel ngwaa kahururire Nebukadnesar oviṋa. Eye ma yenene okukahurura omaheero womambo nga.’

Daniel weya kombara. Beltsasar wa tja ku ye: ‘Ove tji mo yenene okulesa nokukahurura omambo nga, ami me ku pe ouketanga wongoldo neku tjiti kutja urire omundu omunamasa omutjatatu moBabilon.’ Daniel wa tja: ‘Ami hina okuvanga oviyandjewa vyoye, posiya me ku raere kutja omambo nga maye hee tjike. Iho, Nebukadnesar wa ri omuritongamise nu Jehova wa tjita kutja ma rire omurisusuparise. Ove mo tjiwa oviṋa avihe mbya tjitwa ku ye, posiya ove koraisire ondengero ku Jehova mokunwina omavinu momakopi wongoldo nga za mondjuwo Ye ondjapuke. Mukuru opa zokutjanga omambo nga: Mene, Mene, Tekel na Ufarsin. Omambo nga maye hee kutja Ovamedi nOvapersi mave havere Babilon, nu ove ko nakurira ombara rukwao.’

Aape munika tjimuna kapena omundu ngu ma yenene okuhavera Babilon. Orondu otjihuro hi tja kovererwe i otumbo twomasa nonḓonḓu ongoto.  Posiya ouṱuku otjingewo mbo, Ovamedi nOvapersi va wira Babilon. Ombara Kirus yaPersi ya hendurura onḓonḓu kokutja ovarwe ve, ve yenene okuhita momivero vyotjihuro. Posiya tji va vaza mbo omivero tjandje vya paturuka! Otjimbumba tjovarwe tja purukutira mo, atji havere otjihuro natji zepa ombara. Okuzambo Kirus ongwa rira omunane waBabilon.

Kuṱa komaandero wombura imwe, Kirus wa tjivisa na tja: ‘Jehova we ndji raera kutja mbi tungurure ondjuwo ye ondjapuke moJerusalem. Ngamwa auhe wovakarere vaJehova ngu ma vanga okuvatera, ma yenene okuyenda.’ Okutja otja Jehova pa kwizika, Ovajuda ovengi va yaruka konganda kombunda yozombura 70 Jerusalem tji tja za nokuyandekwa. Kirus wa hinda omakopi wongoldo nosilveri noviungurisiwa Nebukadnesar mbya toora okuza mondjuwo ondjapuke yaMuhona. Mo munu nao kutja Jehova wa ungurisa vi Kirus okuvatera otjiwaṋa tje?