Ĩtina wa ĩvinda Mbelisasa nĩwatwʼĩkie mũsumbĩ wa Mbaviloni. Ũtukũ ũmwe nĩwathokisye andũ ngili ĩmwe ala maĩ na nguma mũno nthĩ ĩsu. Ĩtina wa ũu, nĩweeaĩe athũkũmi make maete ikombe sya thaavu ila Nevukatilesa waumĩtye ĩkalũnĩ ya Yeova. Mbelisasa na aeni ala maĩ mbokanĩ ĩsu nĩmatũmĩie ikombe isu kũnywʼa mbinyu na mambĩĩa kũkumya ngai syoo. Maendeee kũnywʼa nĩvoonekie kwʼoko kwa mũndũ ũkũtanĩ na kwambĩĩa kũandĩka ndeto itekũeleeka.

Yĩla Mbelisasa woonie ũu nĩwatelemile mũno. Nĩweetie awe make na amea atĩĩ: ‘Mũndũ ũla ũkũngelesya kĩla kĩkwonanwʼa nĩ ndeto ii ngamũtwʼĩkĩthya mũndũ ũla mũnene wa katatũ ũsumbĩnĩ wa Mbaviloni.’ Awe asu nĩmatatie kũelesya ĩndĩ vaiĩ ũmwe woo waĩ atonya kũelesya nesa. O maendeee, mũka wa mũsumbĩ nĩwookie na asya atĩĩ: ‘Ve mũndũ wĩtawa Ndanieli ũla waeleasya Nevukatilesa maũndũ mailye ta aa. No akũelesye kĩla ndeto isu ikwonanyʼa.’

Ndanieli nĩwookie vala mũsumbĩ waĩ. Na ĩndĩ Mbelisasa amwĩa: ‘Wanzomea ndeto ii na wangelesya kĩla ikwonanyʼa, nĩngũũnenga ĩsoa ya thaavu na ndiũtwʼĩkĩthya mũndũ ũla mũnene wa katatũ ũsumbĩnĩ wa Mbaviloni.’ Nake Ndanieli amũsũngĩa amwĩa: ‘Ndikwenda mĩthĩnzĩo yaku, o na ũu wĩ o vo nĩngũũtavya kĩla kĩkwonanwʼa nĩ ndeto isu. Nevukatilesa ĩthe waku aĩ na ngathĩĩo ĩndĩ Yeova amũninĩvya. We nĩwĩsĩ maũndũ onthe ala mamũkwatie, ĩndĩ nũleete kũmũnenga Yeova ndaĩa kwa kũnywʼa mbinyu na ikombe sya thaavu ila syaumiwʼe ĩkalũnĩ yake. Kĩu nĩkyo kĩtumie Ngai aandĩka ndeto ii: Mene, Mene, Tekeli, na Uvalasini. Ndeto isu syĩonanyʼa kana Ametia na Avelisia makasinda Mbaviloni na we ndũkaendeea kwĩthĩwa mũsumbĩ.’

Mũndũ aĩ atonya kwasya kana Mbaviloni ndĩsa kũsindwa. Nĩkĩ? Nũndũ ndũa ĩsu yathyũlũlũkĩtwe nĩ ngũta  ndũmu mũno na ũsĩ mũnene. Ĩndĩ ũtukũ ũsu Ametia na Avelisia nĩmavithũkĩie ndũa ĩsu. Mũsumbĩ wa Velisia weetawa Kulusi nĩweelelũkilye kĩwʼũ kya ũsĩ ũsu na ũu watuma asikalĩ make mathi nginya mĩvĩanĩ ya ndũa ĩsu. Yĩla mavikie mĩvĩanĩ meethĩie yĩ mbingũe. Asikalĩ asu malikile ĩmwe kwa ĩmwe ndũanĩ ĩsu, mamĩsinda na mooaa mũsumbĩ. Na ĩndĩ Kulusi asumbĩka Mbaviloni.

Ĩtina wa mwaka ũmwe, Kulusi atavisye andũ atĩĩ: ‘Yeova ambĩie nĩnake ĩngĩ ĩkalũ yake yĩla yĩ Yelusaleme. Mũndũ ũla ũmũthaithaa Yeova na nũkwenda kũthi kũtetheesya wĩanĩ ũsu no athi.’ Kwoou o tondũ Yeova wathanĩte, Ayuti aingĩ nĩmasyokie Yelusaleme ĩtina wa myaka 70 kuma Yelusaleme yaanangwa. O na Kulusi nĩwatũngie ikombe sya thaavu na vetha vamwe na mĩio ĩngĩ ĩla Nevukatilesa wakuĩte kuma ĩkalũnĩ. Nĩwoona ũndũ Yeova wamũtũmĩie Kulusi kũtetheesya andũ make?