Na nima, Belshasare kumaka ntotila ya Babilone. Kilumbu mosi na mpimpa, yandi bingisaka bantu mingi ya mfunu mingi ya insi na yandi na feti. Yandi songaka bansadi na yandi na kunata makopa ya wolo yina Nebukadenezare bakaka na tempelo ya Yehowa. Belshasare ti banzenza na yandi nwaka na makopa yina mpi bo kumisaka banzambi na bo. Na mbala mosi, diboko mosi basikaka mpi yantikaka kusonika mambu ya kuyituka na kibaka ya nzo yina bo vandaka kudia.

Belshasare waka boma. Yandi bingaka bantu na yandi ya mazi mpi yandi silaka bo nde: ‘Muntu yina ta tendula bisono yai, mono ta kumisa yandi muntu ya tatu ya kuluta mfunu na Babilone.’ Bo mekaka, kansi ata muntu mosi ve kukaka kutendula yo. Ebuna ntotila-nkento kotaka mpi tubaka nde: ‘Kele ti muntu mosi, zina na yandi Daniele; yandi vandaka kutendudila Nebukadenezare mambu. Yandi lenda tendudila nge bisono yai.’

Daniele kotaka kisika ntotila vandaka. Belshasare songaka yandi nde: ‘Kana nge tanga bisono yai mpi nge tendula yo, mono ta pesa nge mayaka ya wolo mpi mono ta kumisa nge muntu ya tatu ya mfunu mingi na Babilone.’ Daniele tubaka nde: ‘Mu ke ve na mfunu ya makabu na nge, kansi mu ta songa nge ntendula ya bisono yai. Tata na nge, Nebukadenezare, vandaka lulendo, mpi Yehowa kulumusaka yandi. Nge me zaba mambu yonso yina kuminaka yandi, kansi nge me vweza Yehowa mutindu nge me nwa vinu na makopa ya wolo yina katukaka na tempelo na yandi. Yo yina Nzambi me sonika bangogo yai: Mene, Mene, Tekele, mpi Parisini. Bangogo yai ke tendula nde bantu ya Media ti ya Persia ta nunga Babilone, mpi nge ta vanda diaka ve ntotila.’

Yo vandaka kumonana bonso nde muntu mosi ve lenda nunga Babilone. Bibaka ya ngolo mpi nzadi ya mudindu vandaka kutanina mbanza yai. Kansi kaka na  mpimpa yina, bantu ya Media mpi ya Persia nwanisaka bo. Sirusi, ntotila ya Persia, salaka nde masa ya nzadi kuluta na nzila ya nkaka yo yina basoda na yandi kwendaka tii na bakielo ya mbanza. Ntangu bo kumaka kuna, bakielo vandaka ya kukanguka! Basoda kotaka na mbanza, nungaka yo, mpi fwaka ntotila. Ebuna Sirusi kumaka mfumu ya Babilone.

Na nima ya mvula mosi, Sirusi tubaka nde: ‘Yehowa me songa mono na kutunga diaka tempelo na yandi na Yeruzalemi. Bantu na yandi yonso yina ke zola kupesa maboko lenda kwenda.’ Yo yina, mutindu Yehowa silaka, Bayuda mingi vutukaka na insi na bo bamvula 70 na nima ya kufwa ya Yeruzalemi. Sirusi vutulaka makopa ya wolo mpi ya arza ti bisadilu yina Nebukadenezare bakaka na tempelo. Keti nge me mona mutindu Yehowa sadilaka Sirusi sambu na kusadisa bansadi na yandi?