တၢ်မၤလိ ၆၃
လံာ်မဲာ်ဖျၢၣ်လၢတၢ်ဒူၣ်ကပၤလိၤ
တၢ်ဆၢကတီၢ် လဲၤပူၤကွံာ်ဒီးစီၤဘ့ၤလၡါစၢ် ကဲထီၣ်စီၤပၤလၢ ကီၢ်ဘၤဘူၤလိၣ်အပူၤလီၤ. ဘၣ်တနၤန့ၣ် အဝဲကွဲမုာ်ဝဲ အပဒိၣ်ဖးဒိၣ်တကထိဒ်သိး ကအီၣ်သကိး အီသကိးတၢ်အဂီၢ်လီၤ. တကတီၢ်ဃီန့ၣ် စီၤပၤဘ့ၤလၡါစၢ်မၢ အခ့အပှၤတဖၣ်ဟဲစိာ်ဝဲ ထံခွးထူလၢ စီၤပၤနဘူၤကးန့စၢ် ဟဲက့ၤစိာ်ဝဲလၢယဟိဝၤယွၤ အတၢ်လုၢ်ဟံၣ်ပူၤန့ၣ်လီၤ. စီၤပၤဘ့ၤလၡါစၢ် ဒီးအပှၤတမှံၤတဖၣ်အီစပံးထံလၢ ထံခွးတဖၣ်အံၤအပူၤ ဒီးစံးထီၣ်ပတြၢၤဝဲ အဝဲသ့ၣ် အကစၢ်ယွၤတဖၣ်န့ၣ်လီၤ. လၢတၢ် တပာ်သူၣ်ပာ်သးအပူၤန့ၣ် စုတခီ ဟဲဖျါထီၣ် ဒီးကွဲးလီၤဝဲလံာ်မဲာ်ဖျၢၣ်လၢ တၢ်ဒူၣ်အကပၤလီၤ.
စီၤပၤဘ့ၤလၡါစၢ် ပျံၤတၢ်ဒိၣ်မးလီၤ. အဝဲကိးန့ၢ်ဝဲအခ့အပှၤလၢ အမၤကဒါမဲာ်တဖၣ် ဒီးအၢၣ်လီၤအဝဲသ့ၣ်လၢ– ‘ပှၤတဂၤဂၤ တဲဖျါထီၣ်တၢ်ကတိၤအံၤ အခီပညီမ့ၢ်ဘၣ်န့ၣ် ယကဒုးကဲထီၣ်အီၤလၢ ပှၤအဒိၣ်ကတၢၢ် သၢဂၤတဂၤလၢ ကီၢ်ဘၤဘူၤလိၣ်အပူၤလီၤ.’ ဘၣ်ဆၣ် အဝဲသ့ၣ်တဲဖျါထီၣ်ဝဲ တၢ်ကတိၤအံၤအခီပညီ တဘၣ်နီတဂၤဘၣ်. ဝံၤဒီးနီၢ်ပၤမုၣ် ဟဲနုာ်လီၤဝဲဒီးတဲဘၣ်အီၤလၢ– ‘ပိာ်ခွါအိၣ်ဝဲတဂၤ အမံၤမ့ၢ်စီၤဒၤနံးယ့လး ဒီးလၢညါန့ၣ်အဝဲတဲဘၣ်ဝဲ စီၤပၤနဘူၤကးန့စၢ် အတၢ်မံမီၢ်အခီပညီလီၤ. အဃိ ဘၣ်ဃးဒီးတၢ်ကတိၤတဖၣ်အံၤ အခီပညီန့ၣ်အဝဲတဲဘၣ်နၤသ့ဝဲလီၤ.’
စီၤဒၤနံးယ့လး ဟဲဆူစီၤပၤအအိၣ်လီၤ. ဒီးစီၤပၤဘ့ၤလၡါစၢ် တဲဘၣ်အီၤလၢ– ‘နဖးဒီးတဲဘၣ်ယၤတၢ်ကတိၤတဖၣ်အံၤ အခီပညီမ့ၢ်ဘၣ်န့ၣ် ယကဟ့ၣ်လီၤနၤဖဲထူ ဒီးယကဒုးကဲထီၣ်နၤလၢ ပှၤအဒိၣ်ကတၢၢ်သၢဂၤတဂၤ လၢကီၢ်ဘၤဘူၤလိၣ်အပူၤလီၤ.’ စီၤဒၤနံးယ့လး တဲဘၣ်အီၤလၢ– ‘ယတလီကီနတၢ်ဟ့ၣ်တဖၣ်ဘၣ်, ဘၣ်ဆၣ် ယကတဲဘၣ်နၤ တၢ်ကတိၤအံၤအခီပညီလီၤ. နပၢ်နဘူၤကးန့စၢ် ပာ်ထီၣ်ထီအသးအဃိ ယဟိဝၤယွၤဆီၣ်လီၤအီၤလီၤ. နသ့ၣ်ညါတၢ်လၢ အဟဲကဲထီၣ်သး ဒီးနပၢ်ခဲလၢာ်လီၤ. ဘၣ်ဆၣ် နတပာ်ကဲယဟိဝၤယွၤ ခီဖျိနအီစပံးထံလၢထံခွးထူအပူၤ လၢဘၣ်တၢ်ဟဲက့ၤစိာ်အီၤလၢ ယွၤအတၢ်လုၢ်ဟံၣ်အပူၤန့ၣ်လီၤ. အဃိ ကစၢ်ယွၤကွဲးလီၤဝဲတၢ်ကတိၤ လၢအမ့ၢ်– မန့ၤ, မန့ၤ, တက့လး, အူပၢ်စံၣ်လီၤ. တၢ်ကတိၤတဖၣ်အံၤ အခီပညီမ့ၢ်ဝဲ တၢ်ကဟ့ၣ်လီၤဘၤဘူၤလိၣ် အဘီအမုၢ်လၢ ပှၤမၤဒဲဖိဒီးပှၤပၤရၣ်ဖိအစုပူၤ ဒီးနတကဲစီၤပၤလၢၤဘၣ်.’
ဘၤဘူၤလိၣ် အထံကီၢ်န့ၣ်ဖျါလၢ ပှၤဟဲဒုးနၢၤဝဲတန့ၢ်နီတဂၤဘၣ်. ဘီမုၢ်အံၤ ဘၣ်တၢ်ဒီသဒၢအီၤလၢ ဝ့ၢ်ခိၣ်ဒူလၢအကျၢၤဒီး ထံကျိဖးယိာ်န့ၣ်လီၤ. ဘၣ်ဆၣ်နၤအဝဲန့ၣ် ပှၤမၤဒဲဖိဒီးပှၤပၤရၣ်ဖိ ဟဲဒုးဝဲဝ့ၢ်အံၤလီၤ. ပၤရၣ်အစီၤပၤကိရ့ၣ် ခူၣ်ဝဲ ထံအကျိၤ ဒ်သိးကမၤလီၤစှၤကွံာ် ထံကျိအထံဒီးအပှၤသုးဖိတဖၣ် လဲၤဃီၤဝဲဆူဝ့ၢ်အပဲတရီလီၤ. ဖဲပှၤသုးဖိတဖၣ်လဲၤတုၤလၢ ဝ့ၢ်အပဲတရီအခါ အဝဲသ့ၣ်ထံၣ်ဘၣ်ဝဲလၢ ပဲတရီအိးထီၣ်ပာ်စၢၤ အသးလီၤ. အဃိပှၤသုးဖိတဖၣ်န့ၣ် လဲၤနုာ်လီၤလၢဝ့ၢ်ပူၤ, ဒုးနၢၤဝဲဝ့ၢ်ဒီးမၤသံကွံာ် ဘၤဘူၤလိၣ်အစီၤပၤလီၤ. ဝံၤဒီး စီၤကိရ့ၣ် ပၢက့ၤဝဲဝ့ၢ်ဘၤဘူၤလိၣ်လီၤ.
လၢတနံၣ်အတီၢ်ပူၤ စီၤကိရ့ၣ်တဲဝဲလၢ– ‘ယဟိဝၤယွၤ မၢယတ့ထီၣ်က့ၤ ဝ့ၢ်ယရူၤၡလ့ၣ်အတၢ်လုၢ်ဟံၣ်န့ၣ်လီၤ. ဒီးယွၤအပှၤဂီၢ်မုၢ် မ့ၢ်အဲၣ်ဒိးက့ၤမၤစၢၤတၢ်တဂၤဂၤန့ၣ် က့ၤသ့လီၤ.’ လၢတၢ်န့ၣ်အဃိ ဒ်ယဟိဝၤယွၤ အၢၣ်လီၤအီလီၤဝဲအသိးန့ၣ်, ဝ့ၢ်ယရူၤၡလ့ၣ် ဘၣ်တၢ်မၤဟးဂီၤအီၤ ပူၤကွံာ်အနံၣ် ၇၀ ဝံၤအလီၢ်ခံ ပှၤယူဒၤဖိအါဂၤ က့ၤကဒါက့ၤလၢ ဝ့ၢ်ယရူၤၡလ့ၣ်အပူၤလီၤ. တကးဒံးဘၣ် စီၤကိရ့ၣ်ဆှၢကဒါက့ၤ ထံခွးထူ, ထံခွးစ့ ဒီးတၢ်ပီးတၢ်လီအဂၤတဖၣ်လၢ စီၤပၤနဘူၤကးန့စၢ် ဟဲက့ၤစိာ်ဝဲလၢကစၢ်ယွၤ အတၢ်လုၢ်ဟံၣ်ပူၤန့ၣ်လီၤ. ပထံၣ်ဘၣ်လၢ ယဟိဝၤယွၤသူဝဲ စီၤကိရ့ၣ်လၢကမၤစၢၤအပှၤဂီၢ်မုၢ်အဂီၢ်လီၤ.
“ဘၤဘူၤလိၣ်ဖးဒိၣ်လီၤပှီၢ်လံ, လီၤပှီၢ်လံ, ဒီးကဲထီၣ်တၢ်ဝံတၢ်နါအလီၢ်” လီၤ.—လီၣ်ဖျါ ၁၈:၂
