Belisasara kwa ya kere hompa gwaBabironi. Esiku limwe, kwa zigidire vantu wovanzi womulyo mosirongo kosipito. Makura ta tumu vakareli vendi va ka rete nonkinda edi ga ka gusire Nebukadenesara montembeli zaJehova. Belisasara novantu ava ga zigidire kwa nwininine mononkinda odo, oku tava fumadeke vakarunga vawo. Va tara ko, kuwoko komuntu kuna kutjanga nonkango pekuma.

Belisasara kwa tukukire. Ta zigida nompure dendi nokuditantera asi: ‘Nkenye ogu na resa nonkango edi, tani mu tura a kare gwautatu mokupangera sirongo.’ Navenye kapi va vhulire kuresa nonkango odo. Ozina vahompa tava wiza nokumutantera asi: ‘Pweli mugara gedina Ndaniyera ogu nga fatwilire yininke Nebukadenesara. Age kuvhura a ya ku fatwilire nonkango odo.’

Ndaniyera ta wiza kwahompa. Belisasara ta mu tantere asi: ‘Nsene no resa nokufaturura nonkango edi, tani ku dwareke elyenge lyongorodo ni ku ture gwautatu mokupangera sirongo saBabironi.’ Ndaniyera ta tanta asi: ‘Kapi nina hepa uhwi woge, nye nani ku tantera eyi dina kutanta nonkango odo. Oguho Nebukadenesara, kwa linenepekere nye Jehova tava nunupike. Ove wa diva nayinye eyi ya va horokerere, nye yiyo ono kudira kufumadeka Jehova pokunwina vhinyu mononkinda dongorodo domontembeli zendi. Yipo nye Karunga ana tjangere nonkango edi: “Sivaro, Sivaro, heteko, ntani magaunuko.” Nonkango edi kutanta asi Vamede noVaperesiya ngava funda Babironi, ntani ove kapi ngo kara hena hompa.’

Ayo kwa monekere ngwendi kwato gokuvhura kufunda Babironi. Morwa kwa kere nomakuma gomanene ntani kwa si kundurukidire mukuro. Nye masiku googo,  Vamede noVaperesiya kwa si homokerere. Hompa goVaperesiya Koresi kwa pwilikire mukuro yipo vakwayita vendi va ze mositata. Apa va ka sikire, mavero gana zeguruka! Vakwayita tava hwilire nokuzonagura sitata nokudipaga hompa. Konyima, Koresi ta tameke kupangera Babironi.

Momvhura zoozo, Koresi ta divisa asi: ‘Jehova ana tantere nge asi ntembeli zendi va zi tungurure. Nkenye ogu ana hara kukavatera kuvhura kuza.’ Moomu ga yi tumbwidilire Jehova, Vajuda wovanzi kwa tengwire koJerusarema konyima zonomvhura 70 kutunda apa va zonagwire Jerusarema. Koresi kwa tengwidire nonkinda dongorodo nedi dosisiliveli ntani noyipako eyi ga ka gusire Nebukadenesara montembeli. Ono mono omu Jehova ga ruganesere Koresi a vatere vantu vendi ndi?