Kuna kwalanda, Belesasa wakituka se ntinu a Babele. Lumbu kimosi muna fuku, wavangisa nkinzi yo bokelesa ulolo wa mfumu za nsi. Wavovesa ntaudi zandi vo batwasa mbungwa za wolo zina Nebukandesa kabonga muna tempelo a Yave. Belesasa ye awana kabokelesa banuina vinyo muna mbungwa zazina yo kembelela nzambi zau. Kuna kinsalukisa, koko kwa muntu kwavaika yo yantika soneka mvovo miampimpita muna yaka kia suku dina badilanga.

Belesasa wamona o wonga. Wabokelesa nganga zandi za mpandu yo kubasia nsilu vo: ‘Konso ona olenda sasila masono mama, ikunkitula se muntu wantatu muna Babele.’ Bateza sasila masono mama, kansi ke balenda ko. I bosi, o ntinu ankento wayiza yo vova vo: ‘Vena yo muntu una ye nkumbu a Daniele ona wasasilanga mambu kwa Nebukandesa. Olenda kuzayisa e nsas’a masono mama.’

Daniele wayenda kwa ntinu. Belesasa wamvovesa vo: ‘Avo olendele tanga yo sasila e mvovo miami, ikuvana nsing’a nsingu wa wolo yo kukitula muntu wantatu osundidi o nene muna Babele yawonso.’ Daniele wavova vo: ‘Kizolele tambula tukau ko, kansi ikuzayisa e nsas’a masono mama. O se diaku Nebukandesa nkwa lulendo kakala, Yave wankulula. Ozeye mawonso mambwila. Kana una vo i wau, kuzitisi Yave ko kadi onuinini e vinyo muna mbungwa za wolo za tempelo andi. I dianu Nzambi kasonekene mvovo miami: Mene, Mene, Tekele, Perese. Masono mama masongele vo e Babele ibakwa kwa Amadai ye Aparasi. Ongeye kukala diaka ntinu ko.’

Entete, diamonekanga vo ke vena muntu ko olenda sunda Babele. E mbanza yayi yazungwa kwa yaka yampwena ye nkoko wakala ye maza mayingi. Muna  fuku wauna, makesa ma Madai ye Parasi bayiza kubanuanisa. O Kurese wa ntinu a Parasi wayumisa maza ma nkoko kimana masoladi basauka yo lwaka vana mielo mia mbanza. Vava balwaka, bawana e mielo miaziuka. Masoladi bakota, babaka e mbanza yo vonda o ntinu. Kurese wayantika yala Babele.

Vioka mvu mosi, Kurese wavova vo: ‘Yave wampovese vo yatungulula e tempelo andi muna Yerusaleme. Awonso muna nkangu andi ana bazolele sadisa balenda kwau kwenda.’ Nze una Yave kasia nsilu, ayingi muna Ayuda bavutuka kuna nsi au una vavioka 70 lwa mvu tuka Yerusaleme yafwasilwa. Kurese wavutula e mbungwa za wolo ye palata ye salanganu yawonso ina Nebukandesa kabonga muna tempelo. Nga omwene una Yave kasadila Kurese mu sadisa nkangu andi?