Na nsima, Beleshazare akómaki mokonzi ya Babilone. Mokolo moko, asalisaki fɛti mpe abengaki ebele ya bato minene ya Babilone. Asɛngaki basali na ye báya na bakɔpɔ ya wolo oyo Nebukadenezare azwaki na tempelo ya Yehova. Beleshazare ná bapaya na ye bamɛlaki na bakɔpɔ yango mpe bakumisaki banzambe na bango. Na mbala moko, lobɔkɔ ya moto ebimaki mpe ebandaki kokoma makambo moko boye na efelo ya ndako epai bazalaki kolya.

Beleshazare ayokaki nsɔmɔ. Abengaki bato na ye ya maji mpe alakaki bango: ‘Moto oyo akolimbwela ngai maloba oyo, nakokómisa ye moto ya misato oyo aleki monene na Babilone.’ Bato yango bamekaki, kasi moko te alongaki kolimbola maloba yango. Na nsima, mokonzi-mwasi moko akɔtaki mpe alobaki: ‘Ezali na mobali moko na nkombo Danyele oyo azalaki kolimbwela Nebukadenezare makambo. Akoki kolimbwela yo maloba yango.’

Danyele akɔtaki epai ya mokonzi. Beleshazare alobaki na ye: ‘Soki otángeli ngai maloba oyo mpe olimboli yango, nakopesa yo nsinga ya monzɛlɛ ya wolo ya nkingo mpe nakokómisa yo moto ya misato oyo aleki monene na Babilone.’ Danyele alobaki: ‘Nalingi makabo na yo te, kasi nakoyebisa yo ndimbola ya maloba oyo. Tata na yo Nebukadenezare azalaki na lolendo, mpe Yehova akitisaki ye. Oyebi makambo nyonso oyo ekómelaki ye, kasi ozangi limemya epai ya Yehova na ndenge omɛli vinyo na bakɔpɔ ya wolo oyo eutaki na tempelo na Ye. Yango wana, Nzambe akomi maloba oyo: Mene, Mene, Tekele, mpe Parasine. Maloba yango elimboli ete Bamede ná Baperse bakokweisa Babilone, mpe okozala lisusu mokonzi te.’

Ezalaki komonana lokola moto moko te akokaki kokweisa Babilone. Bifelo ya makasi mpe ebale moko mozindo ezalaki kobatela engumba yango. Kasi kaka na butu wana, Bamede ná Baperse bayaki kobundisa  Babilone. Siruse mokonzi ya Perse alekisaki mai ya ebale yango na nzela mosusu mpo basoda na ye bákoka kotambola na makolo tii na baporte ya engumba yango. Ntango bakómaki kuna, bakutaki baporte polele! Basoda ya Perse bakɔtaki, bazwaki engumba mpe babomaki Mokonzi Beleshazare. Bongo Siruse akómaki mokonzi ya Babilone.

Mbula moko na nsima, Siruse alobaki: ‘Yehova ayebisi ngai natonga lisusu tempelo na ye na Yerusaleme. Moto nyonso ya ekólo na ye oyo alingi kosalisa na kotonga akoki kokende.’ Na yango, kaka ndenge Yehova alakaki, Bayuda mingi bazongaki na Yerusaleme mbula 70 nsima ya kobebisama na yango. Siruse azongisaki bakɔpɔ ya wolo ná ya palata mpe bisaleli oyo Nebukadenezare azwaki na tempelo. Omoni ndenge Yehova asalelaki Siruse mpo na kosalisa bato na Ye?