Mwenda mafuku, Beleshazale wāikele mulopwe wa Babiloni. Difuku dimo bufuku, wāityija ku masobo andi bantu kanunu kamo ba bulēme ba mu ntanda’ya. Wāsoñanya bengidi bandi bamuletele bitomeno bya olo, byākaselele Nebukaneza mu tempelo ya Yehova. Beleshazale ne bantu bawāityile kebātomena ku bino bitomeno ne kutumbija babo baleza. Mu kitulumukila, kwāmweka kuboko kwa muntu, kwāshilula kulemba bilembwa bikomo kwivwana ku lubumbu lwa kyumba kya kudīla’mo.

Beleshazale wāzakele. Wāityija bantu bandi ba majende wēbalaya’mba: ‘Muntu ense usa kushintulula bino binenwa, nsa kumutūla bu muntu wa busatu mukomo bininge mu Babiloni.’ Bātompele, ino i kutupu nansha umo wābwenye kwibishintulula. Penepo mulopwe mukaji wātwela’mo kānena’mba: ‘Kudi mwana-mulume umo witwa bu Danyele, wadi ushintulwilanga Nebukaneza myanda. Ubwanya kukushintulwila bino binenwa.’

Bāityija Danyele kudi mulopwe. Beleshazale wāmusapwila’mba: ‘Shi ubwanye kutanga ne kushintulula bino binenwa, nankyo nsa kukuvwika mu nshingo yobe kamuyololo ka olo kadi nkakutūla bu muntu wa busatu mukomo bininge mu Babiloni.’ Danyele wānena’mba: ‘Kokampa byabuntu byobe, inoko nsa kukusapwila mushintulwila bino binenwa. Shobe Nebukaneza wadi na mitatulo, Yehova wamutūkije. Abe uyukile bintu byonso byamufikile, inoko ubaleka kulēmeka Yehova, kotomena vinyu ku bitomeno bya olo bya mu tempelo ya Yehova. O mwanda Leza walembe bino binenwa amba: Mene, Mene, Tekele, ne Palasine. Bino binenwa bishintulula’mba bene Mede ne bene Peleshia basa kunekenya Babiloni, kadi nobe kukekalapo mulopwe monka.’

Byādi bimweka bu i kutupu muntu nansha umo ubwanya kunekenya Babiloni. Kino kibundi kyādi kikingwe na mumbu ya mutyika ne munonga wa mushike. Nansha  nankyo, difuku dimo bufuku, bene Mede ne bene Peleshia bākebatambile. Kilusa, mulopwe wa Peleshia wākupwila mema a munonga ende dingi, mwanda wa bandi basola bābukile’po lwa nshi kufika ne ku bibelo bya kibundi. Abo pa kwabuka, bātana bibelo bishitule! Kibumbo kya divita kyātwela, kyānekenya kibundi, ne kwipaya mulopwe. Kupwa, Kilusa wāanza kwendeja Babiloni.

Ne mwaka mwine kewapwile, Kilusa wāeleja lubila’mba: ‘Yehova wansapwila kumūbakulwila tempelo ya mu Yelusalema. Yewa ense udi na mutyima wa kukwasha’ko mu bantu bandi, ubwanya kwenda.’ Monka mwālaile’kyo Yehova, Bayuda bavule bājokēle kwabo pa kupwa kwa myaka 70 na pāonakanibwe Yelusalema. Kilusa wākajokeja bitomeno ne bipungwa bya olo ne bya ndalama byākaselele Nebukaneza mu tempelo. Le ubamone Yehova mwaāingidijije Kilusa pa kukwasha bantu Bandi?