Pakapita matuku, Beleshasâ wakalua mukalenge wa Babilona. Dituku dikuabu butuku, wakabikidisha bantu batambe bunene ba mu buloba tshinunu mu difesto. Wakatumina bena mudimu bende dîyi bua kulua ne makopo a or avua Nebukadenesâ muangate mu ntempelo wa Yehowa. Beleshasâ ne bantu bavuaye mubikile bakanuina mu makopo au, kutumbishabu nzambi yabu. Tshianza tshia muntu tshiakamueneka diakamue, kutuadijatshi kufunda miaku ivua kayiyi yumvuika ku tshimanu tshia nzubu uvuabu badila.

Beleshasâ wakumvua buôwa bua bungi. Kubikidishaye bena majimbu bende, kubalayaye ne: ‘Muntu yeye mumvuije miaku eyi, nemmuteke muntu muisatu wa bukole bua bungi mu Babilona.’ Bakateta bua kumvuija miaku ayi, kadi muntu nansha umue wa kudibu kakakumbana to. Pashishe Mukalenge mukaji wakabuela, kumuambilaye ne: ‘Kudi muntu mukuabu dîna diende Danyele uvua umvuija Nebukadenesâ malu. Yeye udi mua kukumvuija miaku eyi.’

Danyele wakalua kudi mukalenge. Beleshasâ wakamuambila ne: ‘Wewe mukokeshe mua kubala miaku eyi ne kuyumvuija, nenkupeshe shene wa or wa kuela mu nshingu ne nenkuteke muntu muisatu wa bukole bua bungi mu Babilona.’ Danyele wakamba ne: ‘Tshiena dijinga ne mapa ebe to, kadi nenkuambile tshidi miaku eyi yumvuija. Tatuebe Nebukadenesâ uvua ne lutambishi, kadi Yehowa wakamupuekesha. Wewe udi mumanye malu onso avua mamufikile, kadi kuvua munemeke Yehowa pauvua munuine mvinyo mu makopo a or a ku ntempelo wende to. Ke bualu kayi Nzambi mmufunde miaku eyi: Mene, Mene, Tekele, ne Parsine. Miaku eyi idi yumvuija ne: bena Madayi ne bena Pelasa nebakuate Babilona, ne kuakuikala kabidi mukalenge to.’

Bivua bimueneka bu ne: muntu nansha umue kavua mua kukuata Babilona to. Bimanu binene ne musulu mule bivua bikuba tshimenga atshi. Kadi anu butuku abu, bena Madayi ne bena Pelasa bakalua bua kutshiluisha. Kolesha  mukalenge wa bena Pelasa wakatuma mâyi a musulu au kua tshianana bua basalayi bende baye musangu umue too ne ku biibi bia tshimenga. Bualu bua dikema, pakafikabu ku biibi, bakabisangana biunzulula! Basalayi bakabuela mu tshimenga, kutshikuatabu, ne kushipabu mukalenge. Pashishe Kolesha wakalua mukalenge wa Babilona.

Tshidimu katshiyi tshianji kukumbana, Kolesha wakafila dimayisha wamba ne: ‘Yehowa mungambile bua kuibakulula ntempelo wende ku Yelushalema. Muntu yonso wa mu tshisamba tshiende udi musue kuambuluisha, udi mua kuya.’ Nunku anu bu mukavua Yehowa mulaye, bena Yuda ba bungi bakapingana kuabu bidimu 70 panyima pa dibutuka dia Yelushalema. Kolesha wakapingaja makopo a or ne a arjan ne bintu bikuabu bivua Nebukadenesâ muangate mu ntempelo. Udi mumone muvua Yehowa mutume Kolesha bua kuambuluisha tshisamba tshiende anyi?