Bang’e, Belshaza nobedo ruodh Babilon. Chieng’ moro gotieno, ne oloso nyasi moro e ode, kendo norwako ji duto ma ne imiyo duong’ e piny Babilon e nyasino. Ne ochiko jotichne mondo okel okombe mag dhahabu ma ne Nebukadneza okawo e hekalu mar Jehova. Belshaza gi wende ne ometho e okombego, kendo ne gipako nyiseche manono. Apoya nono, ne gineno lwedo moro ka ndiko weche moko ma galagala e kor ot ma ne gimethoeno.

Luoro ne omako Belshaza. Ne oluongo ajuokene duto mi osingonegi kama: ‘Ng’ato ang’ata ma nyalo lerona tiend wechegi, abiro miye teko mang’eny kendo kete obed namba adek e lochna.’ Ajuokego nothuthni, to onge ng’ato ang’ata kuomgi ma ne nyalo lero tiend wechego. Kae to chi ruoth nonyiso ruoth kama: ‘Nitie ng’at moro miluongo ni Daniel ma ne leroga ne Nebukadneza tiend weche matek. Onyalo leroni wechegi.’

Daniel nobiro. Belshaza nonyise kama: ‘Kisomo wechegi kendo lerona tiendgi, abiro miyi tigo mar dhahabu miliero e ng’ut, kendo abiro miyi teko mondo ibed namba adek e lochna.’ Daniel nodwoke kama: ‘Kik imiya michgo, kata kamano, abiro leroni tiend wechegi. Nebukadneza wuonu nohero ng’are ahinya, to Jehova ne odwoke piny. Ing’eyo maber gik ma notimorene, to e ma pod ichayo Jehova, kendo imetho e okombe ma nowuok e hekalune. Kuom mano, Nyasaye osendikoni wechegi: Mene, Mene, Tekel, gi Parsin. Wechego nyiso ni Jo-Media gi Jo-Persia biro kawo Babilon mi giloch e wiye, kendo ok nichak ibed ruoth kendo.’

Ne nenore ka gima ne onge ng’ama ne nyalo monjo Babilon. Babilon ne ochiel gi ohinga maduong’, kendo ne olwore gi aora matut ahinya. Kata kamano, e otieno achiel achielno, Jo-Media gi Jo-Persia nomonjo Babilon. Kuros ruodh Persia nobaro aora ma nolworo  Babilon mondo omol kochomo kumachielo. Mano nomiyo pi aorano odok piny mochopo kama koro jolwenyge ne nyalo yoro ma gichop e rangeye mag Babilon. Ka ne gichopo, ne giyudo ka ok olor dho rangeye! Ne gidonjo ma giloyo taondno, kendo ne ginego nyaka ruoth. Kae to Kuros nochako locho e wi Babilon bende.

Ka pok higa achiel norumo, Kuros nolando kama: ‘Jehova osenyisa mondo alos hekalu ma ni Jerusalem. Ja-Jerusalem moro amora ma diher dhi konyo e tij gero hekaluno nyalo dok thurgi.’ Mana kaka Jehova ne osesingo, ng’eny Jo-Yahudi ne odok Jerusalem higni 70 bang’ ka ne oseketh Jerusalem. Kuros nodwoko dhahabu kod okombe gi sende mag mula ma ne Nebukadneza okawo e hekalu ma Jerusalem. Be ineno kaka Jehova notiyo gi Kuros e konyo joge?