Inpe letan apre, Baltazar ti vinn lerwa lor Babilonn. Enn aswar, li ti fer enn fet ek li ti invit 1000 dimounn. Sa bann dimounn-la ti parmi bann dimounn pli inportan dan pei. Li ti donn lord so bann serviter pou amenn bann koup an-or ki Naboukodonozor ti pran dan tanp Zeova. Baltazar ek so bann invite ti bwar dan sa bann koup-la, ek zot ti donn laglwar zot bann bondie. Enn sel kout, lame enn zom ti aparet ek li ti koumans ekrir bann mo lor miray dan lasal. Personn pa ti konpran sa bann mo-la.

Baltazar ti gagn extra per. Li ti apel so bann mazisien ek li ti fer zot sa promes-la: ‘Si enn kikenn kapav explik mwa sa bann mo-la, mo pou fer li vinn trwaziem dimounn pli inportan dan Babilonn.’ Me okenn mazisien pa ti reisi explik sa bann mo-la. Lerla, larenn ti vini ek ti dir: ‘Ena enn zom ki apel Daniel. Li ti abitie explik bann rev Naboukodonozor. Li kapav explik twa sinifikasion sa bann mo-la.’

Daniel ti vinn get lerwa, ek Baltazar ti dir li: ‘Si to kapav lir ek explik sa bann mo-la, mo pou donn twa enn lasenn an-or ek mo pou fer twa vinn trwaziem dimounn pli inportan dan Babilonn.’ Daniel ti reponn: ‘Mo pa’le to bann kado, me mo pou explik twa sinifikasion sa bann mo-la. To papa, Naboukodonozor, ti orgeye, ek Zeova ti abes li. To konn tou seki ti ariv li. Me kanmem sa, to pa’nn montre respe pou Zeova. To finn bwar divin dan bann koup an-or ki sorti dan so tanp. Akoz sa, Bondie finn ekrir sa bann mo-la: Mene, Mene, Tekel, ek Parsinn. Sa bann mo-la vedir ki to nepli pou lerwa parski bann Med ek bann Pers pou gagn laviktwar lor Babilonn.’

Babilonn ti enn lavil bien proteze, ar bann gran miray ek enn larivier bien fon. Ek sa ti donn linpresion ki  personn pa ti pou kapav anvayir li. Me dan sa mem lanwit-la, bann Med ek bann Pers ti atake. Lerwa Pers, Siris, ti detourn delo larivier pou ki so bann solda kapav traverse ek ariv kot bann laport Babilonn. Kan zot ti ariv laba, bann laport ti ouver! Bann solda ti rantre, zot ti anvayir lavil, ek zot ti touy lerwa. Lerla, Siris ti diriz Babilonn.

Mwins ki enn an apre, Siris ti dir: ‘Zeova inn dir mwa rekonstrir so tanp dan Zerizalem. Ninport kisannla parmi so pep ki anvi al ede, kapav ale.’ Alor, parey kouma Zeova ti promet, enn kantite Zwif ti retourn kot zot 70 an apre destriksion Zerizalem. Siris ti retourn bann koup an-or ek an-arzan ek bann resipian ki Naboukodonozor ti pran dan tanp. Eski to trouve kouma Zeova inn servi Siris pou ed So pep?