Lino papisile insita, Belisyazali wizile aya umwene uwa ku Babiloni. Wanda umwi usiku, wamile antu aingi acindame uku mutebeto. Waneenyile aomvi yakwe ukuti yalete ma kapu yano Nebukadineza wasenzile ukufuma umwi tempele lyakwe Yeova. Belisyazali na yonsi yano wamile yatandike ukumwela umu makapu kwene yaa nu kulumbanya ya leza yao. Umukupumikizya, kwalolike ikasa ilya monsi ilyatandike ukulemba pa ciumba ivilembo ivitaamanyikwe ala yali mu muputule uno yaliilangamo.

Belisyazali uvwile sana intete. Nupya wamile antu yakwe aacitanga ivya maleele nu kuyaneena ati: ‘Aliwensi aamalondolola upiliulo wa vilembo vii, namamwika ukuya wakwe citatu pa onsi yamaka aa mu Babiloni.’ Yezizye, nomba pasi aliwensi uwalondolwile upiliulo wa vilembo. Lyene namwene wingiile nu kulanda ati: ‘Kwaya umonsi umwi uwi izina lyakuti Danieli uwalondolwelanga Nebukadineza upiliulo uwa vintu. Angakulondolwela upiliulo wa mazwi yaa.’

Danieli wizile ukwali umwene. Belisyazali wamuneenyile ati: ‘Ndi cakuti wabelenga nu kulondolola upiliulo wa vilembo vii, nimakupeela icakuzwala umunsingo cakwe goldi nu kukulenga ukuya umonsi wakwe citatu pa yonsi aa maka umu Babiloni. Danieli nawe watiile: ‘Nsikulonda ivya upe vyako, nomba nimakuneena upiliulo wa vilembo vii. Tata wako Nebukadineza wali ni cilumba, lelo Yeova wamucefizye. Wamanya vyonsi ivyamucitikile, nomba wemo utacindike Yeova pa kumwela umu ma kapu yakwe goldi yano yaafumile umwi tempele lyakwe. Fwandi Leza watalemba ivilembo vii: ‘Mene, Mene, Tekeli, na Palisini. Vilembo vii vikupiliula ukuti Aina Mede na Ina Pesya, yalacimvya umusumba uwa Babiloni nupya wemo utalatala uye umwene.

Calolekanga kwati kusi angacimvya umusumba uwa Babiloni. Umusumba wali ucingililwe ni viumba ivikome  nu luzi uluzike. Nomba usiku kwene uwa, Aina Mede na Ina Pesya yaacimvizye umusumba. Kilusi Umwene uwa ku Pesya wapatwile uluzi pakuti asilika yakwe yapite ukufika uku mpongolo iya musumba. Lino yafisile uku mpongolo, yazanyile ivisaasa iviyulika. Asilika ingiile, nu kuzanza umusumba, nupya yakomile umwene. Lyene Kilusi watandike ukuteeka Babiloni.

Mu mwaka kwene uwa, Kilusi wamanyisizye antu ati: ‘Yeova wataneena ukuti nkakuule cipya cipya itempele mu Yelusalemu. Umuntu ali wensi aakulonda ukwazwilizya ukukuula angapita uku Yelusalemu.’ Fwandi wakwe vivi kwene vino Yeova walavile, Ayuda aingi yaswilile uku mwao pa cisila ica myaka 70 ukufuma pano Yelusalemu ononiilwe. Kilusi waswilizye makapu yakwe goldi na yakwe siuva alino na vyonsi vino Nebukadineza wasenzile ukufuma umwi tempele. Uzye ukulola vino Yeova waomvizye Kilusi pa kupususya antu yakwe?