Teipa, Belsasar pejki tlanauatia ipan Babilonia. Se youali, kichijki se ueyi tlakualistli, uan san kintlanejki mil maseualmej katli tlauel kinixmatiyayaj ipan Babilonia. Uajka tlanauatik ma kiuikilikaj nopa vasos tlen oro katli Nabucodonosor kikixtijtoya ipan teokali ne Jerusalén. Belsasar uan katli kintlanejki kitekiuijkej nopa vasos uan kinueyichijkej ininteotsitsij. Uajka, neski ima se tlakatl uan ipan tlapepecholi pejki kiijkuiloua se keski tlajkuiloli tlen amo aka kikuamachiliyaya.

Belsasar tlauel momajmatik. Kinnotski nopa tlakamej tlen kitekiuiyayaj magia uan kiniljuik: “Katli nechixtomilis tlen kiijtosneki ni tlajkuiloli, nijmakas se tekitl tlen tlauel ipati ipan Babilonia”. Maske nopa tlakamej kichijkej kampeka kiixtomilisej, amo kimatkej tlen kiijtosnekiyaya. Nopa siuatlanauatijketl asito uan kiiljuik Belsasar: “Se tlakatl tlen itoka Daniel kiixtomiliyaya Nabucodonosor tlen amo kikuamachiliyaya. Ya uelis mitsiljuis tlake kiijtosneki ni tlajkuiloli”.

Daniel kiitato nopa tlanauatijketl, uan kema asito, Belsasar kiiljuik: “Tlaj tijpouas uan tinechixtomilis tlen kiijtosneki ni tlajkuiloli, na nimitsmakas se kostli tlen oro uan nimitsmakas se tekitl tlen tlauel ipati ipan Babilonia”. Daniel kiiljuik: “Na amo tleno nijneki. San nimitsiljuis tlake kiijtosneki ni tlajkuiloli. Motata Nabucodonosor tlauel moueyimatiyaya, uan Jehová kipinaualtik. Maske tijmati tlen kipanok motata, nojua amo tijtlepanitak Jehová. Uan tikijik vino ipan nopa vasos tlen oro katli eltoya ipan iteokal. Yeka toTeotsij kiijkuilok ni tlajtoli: MENE, MENE, TEKEL uan UPARSIN. Ni tlajtoli kiijtosneki nopa medos uan persas moaxkatisej Babilonia, uan ta ayokmo titlanauatis”.

Nesiyaya amo aka ueliskia kitsontlamiltis Babilonia, pampa kiyaualojtoyaj ika uejkapantik tepamitl uan se ueyatl panoyaya nopaya. Ipan nopa youali, nopa medos  uan persas kiteuijkej Babilonia. Ciro, tlanauatijketl tlen Persia, kichijki nopa atl ma yaui sejkanok, kiampa itlateuijkauaj ueliskiaj kalakisej. Kema asitoj, ¡Babilonia, tlapojtoya! Nopa tlateuianij kalajkej uan moaxkatijkej nopa altepetl, uan nojkia kimiktijkej tlanauatijketl Belsasar. Ipan Babilonia san tlanauatiskia Ciro.

Ipan achtoui xiuitl kema Ciro tlanauatik, kiijtok: “Jehová nechiljuijtok ma nijkualchijchiua nopa teokali ne Jerusalén. Uelis yasej nochi judíos katli kinekij tlapaleuitij”. Yeka miakej tlakuepilijkej inintlal kema ya panotoya 70 xiuitl kitsontlamiltijtoyaj Jerusalén. Kej nopa moaxitik tlen Jehová kiijtojtoya. Ciro nojkia kinkuepilik nopa vasos tlen plata uan oro, uan nochi tlamantsitsij tlen Nabucodonosor kikixtijtoya ipan teokali. ¿Tikitak kenijkatsa Jehová kitekiuik Ciro kema kinejki kinpaleuis itekipanojkauaj?