Sakin, Belsasar onochiuj tekiuaj ipan Babilonia. Se yeuajli, okichiuj se iluitl niman okiminnots akin ueyixtoyaj ipan itekiuajyo. Okinnauati itlakeualuan ika makuajkuikan vasos tlachijchiujtin ika oro tlen Nabucodonosor okikixti itech iteopan Jehová. Belsasar niman itenotskauan ipan otlaonikej vasos niman opeuj kiueyichiuaj intajtsitsinuan. Kuakon ouajnonexti ima se tlakatl niman opeuj kijkuiloua seki tlajtoltin tlen xnasikamatiya ipan tepantli kampa iluichiujtoyaj.

Belsasar melak onomojti. Okiminnots akin tenaualuiyaj niman okimijli: “Tla yakaj ueli nechtomilia yejuin tlajtoltin, nikchiuas ika yeyi maueyixto ipan Babilonia”. Kuakon okiyejyekojkej, san ika nion se xouel okijli. Kuakon ouajla isiuauj tekiuaj niman okijli: “Nemi se tlakatl itoka Daniel, yejua kitomiliaya tlen kitemikiya Nabucodonosor. Yejua uelis mitstomilis yejuin tlajtoltin”.

Daniel okitato tekiuaj. Belsasar okijli: “Tla tikpoua niman tinechtomilia yejuin tlajtoltin, nejua nimitsmakas se koskatl tlachijchiujtli ika oro niman nikchiuas ika tejua ika yeyi xueyixto ipan Babilonia”. Daniel okinankili: “Xnikneki motetlayokoliluan, san ika, kema nimitsijlis tlenon kijtosnekij yejuin tlajtoltin. Motaj, Nabucodonosor, noueyimatiya niman Jehová okipinaujti. Tikmatstoya tlen ipan onochiuj, maski ijkon, xotiktlakaitak Jehová. Otikinkuik vasos tlachijchiujtin ika oro tlen onkatkaj ipan iteopan niman ipan otikonik vino. Kuakon toTajtsin okijkuilo yejuin tlajtoltin: MENÉ, MENÉ, TEQUEL niman PARSÍN. Yejuin tlajtoltin kijtosnekij ika medos niman persas notlatkitiskej Babilonia niman tejua xok titekiuaj yes”.

 Nesiya ika xakaj ueliskia kinotlatkitis Babilonia. Yejuin ueyikalpan kinpiaya tepantin uejkapamej niman se uejkatlan atentli. San ika, ipan yejon yeuajli, medos niman persas okixnamijkej. Tekiuaj persa Ciro oksekan okiojuitlali atentli niman ijkon isoldados ueliskiaj ajsiskej hasta ipuertas ueyikalpan. Ijkuak ompa oajsikej, ¡ipuertas ueyikalpan tlapojtoyaj! Soldados nimantsin otlaixnamijkej, onotlatkitijkej ueyikalpan niman okimiktijkej tekiuaj. Kuakon Ciro onochiuj tekiuaj ipan Babilonia.

Ipan kachtopa xiuitl, Ciro okijto: “Jehová yonechijli manikyektlali iteopan ipan Jerusalén. Judíos akin kinekiskej ontlapaleuiskej uelis yaskej”. Ijkon ken Jehová okijtoka, miyekej judíos onokuepkej inchan ijkuak yopanoka 70 xiuitl ika yokixoxotonijkaj Jerusalén. Ciro okinkuepili judíos vasos tlachijchiujtin ika oro niman plata tlen Nabucodonosor okikixti itech teopan. ¿Ueli tikita kenon Jehová okikuik Ciro ijkon uelis ika kipaleuis ikalpan?