Aefa daʼö, tobali razo Mbelisasa ba Mbabilona. Samuza inötö me ba zi bongi, ifalua gowasa ba ikaoni saribu niha si so faka. Iwaʼö khö ndra sohalöwö khönia enaʼö labeʼe baero galasi anaʼa nihalö bapania Nebukanesa ba gosali Yehowa. Iʼogunaʼö galasi daʼö Belisasa hegöi tomenia ba wamadu agu ba lasuno lowalangira. Ba zi lö mudöna-döna, oroma danga sanura fehede si lö muʼila eluaha ba dowa naha wemanga.

Ataʼu Mbelisasa. Ikaoni zogonekhe ba gelemu ba ifabuʼu khöra, ’Na so zi tola mamatunö eluaha wehede nisura andrö, ubaliʼö ia niha numero tölu si so kuaso ba Mbabilona.’ Laforege, hizaʼi samösa lö si tola mamoʼeluaha. Aefa daʼö, tohare ratu ba imane, ’So mesane zotöi Danieli sasese mamatunö fangifi Nebukanesa. Tola ifatunö khöu geluaha nisura andrö Tua.’

Tohare Danieli wamalukhaisi razo. Imane Belisasa, ’Na tola öbaso ba öfatunö khögu geluaha wehede andrö, ba ubeʼe khöu naya anaʼa, ba tobali ndraʼugö niha numero tölu sebua kuaso ba Mbabilona.’ Imane Danieli, ’Lö omasido mbuala andrö Tua, hizaʼi ufatunö khöu geluaha wehede andrö. Asiliyawa sibai bapamö Nebukanesa Tua, ba iʼailasi ia Yehowa. Öʼila samösa hadia zalua khönia, hizaʼi lö öʼosinangegö Yehowa. Öʼogunaʼö galasi nihalö moroi ba gosali Yehowa ba wamadu agu. Daʼö mbörö wa isura Lowalangi wehede daʼa: Mene, Mene, Tekel, ba Upharsin. Ngawua wehede daʼö eluahania, famatörö Media hegöi Feresia zokalaisi Babilona, ba lö saʼae tobali ndraʼugö razo Tua.’

Me luo daʼö, hulö lö hadöi si tola manudugö Babilona. No ifasui mbanua andrö towa saweʼe-weʼe hegöi idanö sabakha. Hizaʼi, lasuwö mbanua andrö  ira niha Media ba Feresia ba zi bongi daʼö. Iholeʼö lala nidanö andrö razo Weresia sotöi Kiro irege tola laʼötö ira saradadunia ofeta ba mbawa göli mbanua. Me larugi, no teboka mbawa göli! Möi bakha ndra saradadu, ladudugö mbanua daʼö, ba labunu Razo Mbelisasa. Aefa daʼö, Kiro zi tobali samatörö ba Mbabilona.

Döfi aefa daʼö, ibeʼe gangombakhata Kiro, ’No iwaʼö khögu Yehowa ba wangehaogö mangawuli osalinia ba Yeruzalema. Gofu haniha manö zomasi manolo, tola möi ia ba daʼö.’ Me no töra 70 fakhe waʼadudu Yeruzalema, ato niha Yahudi sangawuli ba mbanuara simane si no ifabuʼu khöra Yehowa. Ifangawuli Kiro galasi anaʼa hegöi firö awö gama-gama nihalö Nebukanesa moroi ba gosali. Öʼila, hewisa Yehowa wangogunaʼö Kiro ba wanolo ono mbanuania?