Tʼahádóó Belsházar éí Bábilangi naatʼáanii jizlı̨́ı̨́ʼ. Diné bídahólníihii áłah ájiilaa. Díí tłʼééʼ daʼdiidı̨́ı̨́ł jidííniid. Áko kin biiʼ sohodizin biiʼdę́ę́ʼ adeeʼ óola bee ádaalyaii Nébukadnézzar yineezʼı̨́ı̨́ʼ yę́ę hadayiiznil. Belsházar dóó baa daaskaígíí díí adeeʼ yiiʼdóó daʼadlą́ągo bidiyin yaa dahaniih. Tʼáadoo hooyání álaʼ léiʼ yitʼíní silı̨́įʼgo kin biyiʼdę́ę́ʼ saad doo bééhózinii yee akʼeʼashchı̨́.

Belsházar násdzííd. Álílee kʼehgo ádaʼoołʼįįłii ííłní: ‘Tʼáá háíshı̨́ı̨́ díí saad bee shił hojoolneʼgo Bábilangi tááʼ góneʼ hóhólníihgo áhodeeshłííł.’ Díí saad chʼééh yikʼidaʼdiitįįh. Queen yah ííyáago ání: ‘Hastiin Daniel wolyéego kódaatʼéii Nébukadnézzar yee yił náhálnih ńtʼééʼ. Éí shı̨́ı̨́ nił ííshjání íidoolííł.’

Naatʼáanii Belsházar Daniel ííłní: ‘Díí saad yíníłtaʼ áádóó ááhyiłníigi bee shił hwíínílneʼgo, yooʼ óola naa deeshłééł áádóó Bábilangi tááʼ góneʼ níhólníihgo áńdeeshłííł.’ Daniel ání: ‘Shaa díílééłígíí doo nisin da, ndi díí saad ááhyiłnínígíí bee niłi hodeeshnih. Nizhéʼé Nébukadnézzar ayóó ádaa haʼniih ńtʼééʼ, ndi Jiihóvah aʼohgo áhoolaa. Díí éí nił bééhózin ndi, Jiihóvah doo nił nilı̨́ı̨́góó biKin biiʼdę́ę́ʼ adeeʼ óola bee ályaa wáin bee yinidląąʼ. Éí biniinaa God díí saad yee akʼeʼeshchʼı̨́: Míínii, Míínii, Tííkel, dóó Yufársin. Díí saad éí Míídiya dóó Pérzha dineʼé Bábilan dineʼé yikʼeh dadidoodleeł áádóó ni éí doo naatʼáanii nílı̨́į da doo.’

Bábilan doo bikʼeh hodódleeł átʼée da. Kin dah shijaaʼ binázʼáhígíí ayóó íídéetą́ą́ʼ áádóó tó ditą́ągo binázlı̨́. Ákótʼée ndi, tʼáá éí bitłʼééʼ Míídiya dóó Pérzha dineʼé hakʼiijééʼ. Pérzha binaatʼáanii Sáíras tó łahjigo íílı̨́įgo áyiilaa.  Kótʼéego bisiláo doo nantłʼagóó yah ííjééʼ. Dáńʼdítı̨́ı̨́h tʼáá ąą átʼéé lá! Áko Sáíras bisiláo éí Bábilan yikʼeh dadeesdlı̨́ı̨́ʼ áádóó Belsházar dayiisxı̨́. Sáíras éí Bábilangi naatʼáanii jizlı̨́ı̨́ʼ.

Tʼáadoo náháhí Sáíras ádííniid: ‘Jiihóvah éí Jerúsalemdi kin biiʼ sohodizin hashtʼéédíídlííł shiłní. Áká adeeshwoł nízinígíí bá ahóótʼiʼ.’ Jerúsalem éí tsostsʼidiin nááhai yę́ędą́ą́ʼ adoolkʼą́ą́ʼ. Jiihóvah yee nihoníʼánę́ę bikʼehgo, Jew dineʼé Jerúsalemgóó aníjiiskai. Nébukadnézzar kin biiʼ sohodizindę́ę́ʼ jineezʼı̨́ı̨́ʼ yę́ę Sáíras Jerúsalemgóó néiiníjaaʼ. Sáíras choyoołʼı̨́įgo Jiihóvah biDineʼé yíká eelwod, éísh baa ákoninizı̨́ı̨́ʼ?