Momuvo umwe, Belsazar akala ohamba Yombambilonia. Motyinthiki tyimwe alingi otyipito tyimwe otyinene akongo ovanthu 1000 vakolela vali vo mo Mbambilonia. Ohamba aitumu ovaundapi vayo vaete onokopo mbo oolu Nambukondonosole apolele mondyuo ya Jeova. Belsazar novanthu ovakuavo veli motyipito avanuina mo nokopo ombo otyo vahivilika onohuku mbavo. Tyina vakatala-ko okuvoko kukahi nokuhoneka motyimato onondaka mbeheiwe.

Belsazar atili owoma. Aihana ovanthu vae ovanongo evepopila okuti: ‘Inkha omunthu umwe uhangununa onondaka ombu, makala omunthu wa tatu wakolela vali Mombambilonia.’ Ovanthu avahimbika okumbuhangununa mahi nawike wetyivilile. Konyima onkhai-hamba aiya aipopi okuti: ‘Kuna omulume utiwa o Daniele uhole okuhangununina ovipuka Nambukondonosole. Upondola okuhangununa onondaka ombu.’

Daniele eya ko hamba. Belsazar emupopila okuti: ‘Inkha utanga ohangununa onondaka ombu, mandyikuavela okalienge ko oolu iya okala omutumini wa tatu Mombambilonia.’ Daniele ati: ‘Ame hihande okupewa natyike, mahi mandyikupopila etyi onondaka ombu mbuhangununa. Tate yove Nambukondonosole ankho una omalityindailo iya Jeova emukondola koututu. Namphila ove utyii, mahi no ngotyo nkhele utupu onthilo na Jeova ukahi nokunuina ovinyu mono kopo mbo oolu mbatunda mondyuo ya Huku. Otyo Huku ahonekela onondaka ombu mbati: Mene, Mene, Tekel, Parsim. Onondaka ombu mbuhangununa okuti ova Medo no va Persia maveya okuhanya-po Ombambilonia iya ove kumakala vali ohamba.’

Ankho ovanthu vasoka okuti petupu omunthu nawike utyivila okuhanya-po Ombambilonia. Epunda-umbo olio ankho lina ovimato viapama nokuaya peulu, nondongi imwe yaya kohi. Mahi motyinthiki tyatyo omo, ova Medo no va Persia avaluisa epunda-umbo. Ohamba yo Persia itiwa o  Siru aiyapula omaande ondongi omafualali ae anyingila mepunda-umbo. Etyi vehika pomapito aveevasi eumbululu! Omafualali anyingila iya ahanye-po epunda-umbo, aipaa ohamba. Siru akala omutumini wo Mbambilonia.

Etyi palamba enima like Siru apopila ovanthu aveho okuti: ‘Jeova wamphopila ndyikapindule-po ondyuo yae mo Jelusalei. ‘Ayeke ovanthu vae aveho vahanda okumukuatesako vaye ko Jelusalei.’ Ngetyi Jeova alaa ova Judeu ovanyingi vakondokele keumbo etyi palamba omanima 70 tunde apa o Jelusalei yahanyua-po. Siru akondola onokopo mbo oolu nopalata ombu Nambukondonosole apolele mondyuo ya Huku. Wetyimona oñgeni Jeova aundapesa Siru opo akuateseko ovanthu Vae?