Nzinlii, Bɛlehyaza rayɛle Babelɔn belemgbunli. Kenle ko nɔsolɛ nu, ɔdole mgbanyima titili apenle ko mɔɔ wɔ maanle ne anu la ɛkponle kpole bie. Ɔmaanle ye azonvolɛ hɔsesale nvutuke ahɔpo ne mɔ mɔɔ Nɛbukadenɛza sesale bɛ wɔ Gyihova ɛzonlenlɛ sua ne anu la rale. Bɛlehyaza nee ye nyɛvolɛ ne mɔ nlonle ahɔpo ne mɔ anu na bɛhanvole bɛ awozonle ne mɔ. Arɛlevilɛ nu ala, ɛsalɛ bie vindele na ɔhɛlɛle edwɛkɛ bie wɔ ɛleka mɔɔ bɛlɛdi aleɛ ne la bane ne anwo.

Ɛzulolɛ kpole hanle Bɛlehyaza. Ɔvɛlɛle ye ngonyiama ne na ɔbɔle bɛ ɛwɔkɛ kɛ: ‘Awie biala mɔɔ kɛhola kɛhile ngɛlɛlera ɛhye abo la, mebayɛ ye sonla kpole mɔɔ tɔ zolɛ nsa wɔ Babelɔn.’ Bɛbɔle mɔdenle kɛ bɛkile ɔ bo, noko bɛ nuhua biala angola angile ɔ bo. Belemgbunli raalɛ ne rahanle kɛ: ‘Ɛnee nrenyia bie mɔɔ bɛfɛlɛ ye Daneɛle la ta kile ninyɛne bo kile Nɛbukadenɛza. Ɔbahola yeahile edwɛkɛ ɛhye abo yeahile wɔ.’

Daneɛle rale belemgbunli ne ɛkɛ. Bɛlehyaza hanle hilele ye kɛ: ‘Saa ɛkola ɛkenga edwɛkɛ ɛhye na ɛkile ɔ bo a, mebamaa wɔ nvutuke ndweabane, na wɔayɛ sonla kpole mɔɔ tɔ zolɛ nsa wɔ Babelɔn.’ Daneɛle hanle kɛ: ‘Menrɛlie wɔ ahyɛlɛdeɛ ne, noko mebahile edwɛkɛ ne abo meahile wɔ. Ɛ ze Nɛbukadenɛza memanle ɔ nwo zo, na Gyihova bɛlɛle ye aze. Ɛze mɔɔ dole ye la amuala, noko wɔambu Gyihova, bɛva nvutuke ahɔpo ne mɔ mɔɔ wɔ Ye ɛzonlenlɛ sua ne anu la bɛranlo nu. Yemɔti Nyamenle ɛhɛlɛ ngɛlɛlera ɛhye: Mini, Mini, Tikɛle U Pasen. Ngɛlɛlera ne abo kile kɛ Mideama nee Pɛhyeama bali Babelɔn anwo zo konim, na ɛnrɛyɛ belemgbunli bieko.’

Ɛnee ɔzɔho kɛ awie biala ɛnrɛhola ɛnrɛli Babelɔn anwo zo konim. Bane kpole nee azule mɔɔ le kuma la bɔ suakpole ɛhye anwo bane. Noko wɔ zɔhane nɔe ne,  Mideama nee Pɛhyeama tetale Babelɔn. Pɛhyea Belemgbunli Saelɛse pɛle gota dole azule ne anwo maanle nzule ne vale nu na ɔsesanle amaa ye sogyama ahola ahɔ suakpole ne azo. Mɔɔ bɛdwule anlenkɛ ne anwo la ɛnee bɛbuke! Sogyama ne vale suakpole ne, na bɛhunle belemgbunli ne. Akee Saelɛse rayɛle Babelɔn belemgbunli.

Wɔ ɛvolɛ ko anu, ɔhanle kɛ: ‘Gyihova ɛha ɛhile me kɛ menzi ye ɛzonlenlɛ sua ne mɔɔ wɔ Gyɛlusalɛm la bieko. Ye sonvolɛ biala mɔɔ ɔkulo kɛ ɔkɔboa la bahola ahɔ.’ Yemɔti, kɛ mɔɔ Gyihova hanle la, Dwuuma dɔɔnwo ziale hɔle bɛ sua zo Gyɛlusalɛm wɔ ɛvolɛ 70 anzi. Saelɛse vale nvutuke nee dwɛtɛ fufule ahɔpo nee ninyɛne mɔɔ Nɛbukadenɛza sesale vile ɛzonlenlɛ sua ne anu la ziale hɔle. Wɔnwu kɛzi Gyihova maanle Saelɛse boale Ye menli ne la ɔ?