De Tiet kjeem, daut Belsazar de Kjennich von Babel wort. Eenen Zeowes kroagd hee dusent von de aunjeseene Menschen em Launt no een Fast. Hee säd, siene Deena sullen de goldne Kuffels brinjen, waut Nebukadnezar von Jehova sienen Tempel metjenomen haud. Belsazar un siene Jast drunken ut dise Kuffels un preisden äare Jetta. Met eenst wia doa enne Ätstow eene Haunt, waut Wieed aune Waunt naunschreef, un see wundaden, waut daut to bedieden haud.

Belsazar haud sea Angst. Hee leet siene Zaubra komen un säd to dee: “Wäa mie sajen kaun, waut dise Wieed bedieden, woat de dredda von hechsta en Babel woaren.” Dee proowden daut, oba dee kunnen daut nich. Dan kjeem de Kjennijin un säd: “Doa es een Maun, dee heet Daniel. Dee deed Nebukadnezar emma Sachen utlajen. Dee kaun die sajen, waut dise Wieed bedieden.”

Daniel kjeem no dän Kjennich. Belsazar säd to dän: “Wan du dise Wieed läsen un utlajen kaust, dan woa ekj die eene goldne Haulskjäd jäwen un du woascht de dredda von hechsta en Babel woaren.” Daniel säd: “Ekj well de Jeschenkja nich, oba ekj woa die sajen, waut dise Wieed bedieden. Dien Voda Nebukadnezar wia stolt un Jehova muak dän kjlien. Du weetst krakjt, waut met dän wort, un nu vespotst du Jehova, wiels du ut de goldne Kuffels von sienen Tempel Wien drinkjst. Doawäajen haft Gott dise Wieed jeschräwen: Mene, Mene, Tekel un Parsien. Dise Wieed meenen, daut de Meeda un Persa Babel ennämen woaren un daut du nich mea woascht Kjennich sennen.”

Daut sach soo, kjeena kunn Babel ennämen. De Staut haud dikje Mieren un eenen deepen Riefa, waut dee Schutz jeewen. Oba krakjt dee Nacht kjeemen de Meeda un Persa. De persischa Kjennich Kierus deed  dän Riefa aufleiden, soo daut siene Soldoten jlikj aun de Stautspuaten naunkunnen. Aus dee doa aunkjeemen, wieren de Puaten op! De Soldoten stusden en de Staut nenn, neemen dee en un muaken dän Kjennich doot. Lota wort Kierus de Kjennich von Babel.

En sien ieeschtet Joa säd Kierus: “Jehova säd, ekj sull dän Tempel en Jerusalem wada oppbuen. Wäaemma von sien Volkj doa methalpen well, kaun gonen.” Väl Juden jinjen trigj no Jerusalem. Daut wia 70 Joa nodäm daut de Staut venicht wort, krakjt soo aus Jehova daut verutjesajcht haud. Kierus schekjt uk de goldne un selwane Kuffels un de aundre Sachen met, waut Nebukadnezar von dän Tempel metjenomen haud. Es daut nich to bewundren, woo Jehova derch Kierus sien Volkj holp?