Babiloniapiqa Belsasar sutiyuq runañam kamachirqa. Paymi allin riqsisqa achkallaña runakunapaq convidota ruwarqa. Chay tutam Nabucodonosorpa apamusqan qurimanta vasokunapi tomaspanku taytachankuta hatuncharqaku. Chay vasokunaqa Jehova Diospa wasinmanta apamusqankum karqa. Hinaptinmi qunqayllamanta pirqapi maki rikuriruspan mana riqsisqanku letrakunata qillqayta qallaykurqa.

Belsasarmi mancharikuspan layqa runakunata qayachispan nirqa: “Pipas wak qillqapa ima ninan kasqanta willawaqniyqa Babilonia nacionpi kimsa kaq kamachiqmi kanqa”, nispa. Pipas willayta mana atiptinmi, Belsasarpa warmin chayaramuspan nirqa: “Kachkanmi Daniel sutiyuq runa. Paymi Nabucodonosorman musquyninpa ima ninan kasqanta willarqa. Qanmanpas willasunkim chay qillqakunapa ima ninan kasqantaqa”, nispa.

Danieltam Belsasar nirqa: “Sichu qillqapa ima ninan kasqanta niykuwaptikiqa qurimanta collarwanmi wallqachisqayki. Chaymantapas Babilonia nacionpi kimsa kaq kamachiqmi kanki”, nispa. Danielmi nirqa: “Ama imatapas quwaychu. Ichaqa willasqaykim ima ninan kasqanta. Taytayki Nabucodonosor hatun tukuq kaptinmi Jehova Diosqa sunqunta llampuyaykachirqa. Chaykunamanta yachachkaspapas qamqa Jehova Diospa vasonkunapim vinota tomachkanki. Chaymi Diosqa qillqachirqa: ‘Mene, mene, tekel, uparsin’, nispa. Chay rimaykunaqa Media lawpi hinaspa Persia lawpi runakuna Babilonia nacionta munaychakunanmantam nichkan. Qampas manañam kamachiqñachu kanki”, nispa.

Babilonia nacionqa alli-allin pirqayuq hinaspa hatun mayupa harkasqanmi karqa. Enemigonkunam ichaqa mayuta huk lawman muyurachispanku chay  tutalla llapallan soldadonkunawan yaykururqaku, chay llaqtapaqa punkunpas kicharayarqam. Chay yaykuqkunaqa karqa Media lawmantawan Persia lawmantam. Kamachiqninkuñataqmi karqa Ciro sutiyuq runa. Belsasarta wañurachiptinkum Ciroña Babiloniatapas kamachirqa.

Kamachiq Cirom nirqa: “Jehova Diosmi kamachiwarqa Jerusalen llaqtapi Diospa wasinta hatarichipunaypaq. Pipas chay llaqtayuq yanapakuyta munaqqa richun”, nispa. Chaymi Jehova Diospa rimasqanman hina 70 watamanta Jerusalenman kutirqaku. Kamachiq Ciroqa Nabucodonosorpa apakusqan qurimanta vasokunatawan platokunatam Diospa wasinman kutichirqa. Jehova Diosqa Cirowanmi llaqtanta yanaparqa.