Tiempowanmi Babilonia nacionpi Belsasar rey kapuran. Juj tutan payqa 1.000 umalliqkunaman jatun mijuyta invitaran. Jinan reyqa kamachiran Jehová Diospa templonmanta Nabucodonosorpa apachimusqan qori vasokunata apamunankupaq. Jinaspa chay vasokunata utilizaranku ujanankupaq, diosninkutataq alabaranku. Chayllamanmi juj maki perqapi qelqaran mana piqpa entiendesqan simikunata.

Belsasarqa mancharikuranmi, jinan watuqkunata wajachimuspa prometeran: “Kay simikunata explicawaq runan Babilonia nacionpi kinsa kaq kamachikuq kanqa”, nispa. Chaymi llapanku explicayta munaranku, ichaqa manan atirankuchu. Jinan reinaqa jamuspa niran: “Daniel sutiyoq runan Nabucodonosorman explicaran mosqokusqankunata. Payqa atinmi chay simikuna explicayta”, nispa.

Danielqa riranmi Belsasarpa kasqanman, jinan reyqa niran: “Sichus explicawanki kay simikunata chayqa, qorimanta walqanatan qosayki, kinsa kaq kamachikuqtaq kanki”, nispa. Danieltaq niran: “Manan munanichu regaloykitaqa. Ichaqa willasaykin chay simikuna significasqanta. Papayki Nabucodonosorqa orgulloso runan karan, chaymi Jehová Diosqa k’umuykachiran. Yacharankin papaykiwan imachus pasasqanta, chaywanpas manan Jehová Diosta respetankichu. Templonmanta qori vasokunatan utilizaranki vinota ujanaykipaq. Chaymi Diosqa mené, mené, tequel, parsín simikunata qelqachiran. Chay simikunaq significasqanqa kaymi: ‘Medopersia nacionmi Babiloniata jap’ikapunqa, qantaq manaña reychu kanki’”, nispa.

Babilonia llaqtaqa jatunkaray perqakunayoqmi karan, jatun mayutaqmi llaqtaq muyuriqninpi karan, chaymi chay llaqtaman jaykuyqa sasa karan. Ichaqa chay tutatan Medopersia ejercitoqa Babiloniata atacaran. Persia nacionmanta kamachikuq Ciron  mayuta juj ladoman aparan, jinan soldadokunaqa facilta llaqtaq punkunkama chayaranku. Llaqtaq punkunkunatan mana wisq’asqakuchu. Jinan soldadokunaqa kaqpacha atacaspanku llaqtata jap’ikapuranku, reytataq wañuchiranku. Jinaspa Babiloniapi Ciro rey kapuran.

Kamachiyta qallarishaspan Ciroqa niran: “Jehová Diosmi niwaran Jerusalén templota wajmanta sayarichinaypaq. Riyta munaq judiokunaqa richunku”, nispa. Chaymi askha judiokuna kutipuranku. 70 watan pasaran Jerusalén llaqta thunisqa kasqanmanta. Chhaynapin junt’akuran Jehová Diospa prometesqan. Ciroqa nillarantaqmi Diospa templonmanta Nabucodonosorpa apamusqan cosaskunata apapunankupaq. Diosqa Cirotan utilizaran llaqtanta yanapananpaq ¿riki?