Jipa huatacunamanga Belsasar runami Babilonia llactapi rey shina mandai callarirca. Shuj tutaca mil yali gentecunata invitashpami shuj jatun micuita rurarca. Chai llactamanda ashtahuan importante gentecunami chaipi carca. Rey Belsasarca Jerusalenbi Jehovapa templo huasimanda Nabucodonosor apashca oro copacunata llujchichunmi mandarca. Belsasarpash, pai invitashca gentecunapash chai oro copacunapi ufiashpami, yanga dioscunata alicachinajurca. Chaipimi na yashcapi ‘shuj maqui dedocuna ricurirca’. Chai maquica, pircapimi na intindirinalla shimicunata escribijurca.

Chaita ricushpami Belsasarca ninanda manllarishpa paipa “yumbucunata” cayachun cacharca. Paicunataca nircami: ‘Chai pircapi escribishca tiajujta, maijanbash liishpa ima nijujta villajpica’, ‘ñuca mandajuj llactapica ishcaipa jipa mandaj cachunmi churasha’ nishpa. Chai alipacha yachajushcacunapash ‘chai escribishca ima nijujta villaitaca na ushanajurcachu’. Chaimi ‘jatun mandaj huarmi’ shamushpaca cashna nirca: “Danielta cayailla. Paica, chai escribishca ima nijujtapash villangallami”. Paimi Nabucodonosorpa muscui ima cajta villarca nishpa.

Chaimi Danielca reypaman rirca. Belsasarca cashnami Danieltaca nirca: ‘Cai escribishcata can liishpa, chai escribishca ima nijujtapash villajpica, canba cungapipash oro cadenatami churachisha. Ñuca mandajuj llactapipash, ishcaipa cati mandaj cachunmi churasha’ nishpa. Shina nijpimi Danielca nirca: ‘Ima alicunata carangapaj munashcataca, quiquinbajllata saquipailla’. ‘Ñucaca chai escribishca ima nijujtapash villashallami’. Canba taita Nabucodonosortaca jatun tucushca cashcamandami Jehová Diosca pai mandanata quichushpa, humilde canata yachachirca. “Tucui chaicunata yachashpapash” Jehová Diosta ‘na cazushpa, jatun tucushpami paipa huasimanda copacunata apamushpa chai copacunapi vinota ufiarcanguichi’. Chaimandami cai shimicunata escribishca: MENÉ, MENÉ, TEKEL, PARSÍN nishca shimicunami tiajun. Chai shimicunaca caitami ningapaj munan, medos nishca persa nishca gentecuna Babilonia llactata mishajpimi, canga ñana rey cagringui nishpa.

Babilonia llactaca pipash na mishai ushanashnallami ricurirca. Chai llactaca jatun jatun pircacunahuan caimanda, yacu chaupipi caimandami chai llactaca alipacha cuidashca carca. Shinapash chai  tutallatami medos nishcacuna, persa nishca gentecunaca Babilonia llactata llaquichirca. Ciro shuti reymi chai yacucunata shuj ladota cachashpa Babilonia punguman chayai usharca. Shina chayajpimi pungucunaca pascashca cajta ricurca. Ciropa soldadocuna Babiloniaman yaicushpami chai llactata mishashpa, chaimanda reytapash huañuchirca. Shinami rey Ciro Babilonia llactata mandai callarirca.

Ciro ña shuj huatata mandajushpaca caitami nirca: ‘Jerusalenbi paipa huasita cutin shayachichunmi’ Jehová Diosca mandahuarca. Judío puracunamanda maijanbash ayudangapaj munashpaca rinallami canguichi nishpa. Jerusalenda tucuchishca 70 huatacuna jipami judiocunaca paicunapa llactaman tigrarca. Shinami Jehová Diospa nishcaca pactarirca. Shinallata rey Ciroca oro copacunata, culquihuan rurashca copacunata, Nabucodonosor Jehová Diospa templo huasimanda apashca shuj cosascunatapashmi tigrachirca. ¿Ciro shuti reyta utilizashpa Jehová Dios paipa llactata ayudashcata cuenta japircanguichu?