Sar nakhlja o vreme, o Valtasar ulo kralj ko Vavilon. Jekh rat, vičindža ki jekh bari gozba e najvažna manušen ando celo kraljevstvo. Ov naredindža pe slugendže te anen o zlatna čaše so ljelja ljen o Navuhodonosor ando e Jehovaso hram. O Valtasar hem oljese gostija pilje ando odola čaše hem slavindže peklje devljen. Ando jekh puti, pojavindža pe manušikano vas hem počmindža te pisini o lafija ko zido kola niko na haljilo.

O Valtasar but darandilo. Ov vičindža pe mađioničaren hem obećindža ljendže: „Ako neko tumendar vačeri maje so značinena akala lafija, ka čerav lje te ovel o trito najmoćno manuš ko Vavilon.“ On trudindže pe te objasninen o lafija, ama nijekh oljendar naštindža te čerel odova. Alji i kraljica hem phendža ljese: „Isi jekh manuš so vičini pe Danilo, ov hem angljeder e Navuhodonosorese objasnindža but buča. Ov šaj te objasnini hem tuče so značinena akala lafija.“

O Danilo alo ko kralj. O Valtasar phendža ljese: „Ako šaj te čitine hem te objasnine maje akala lafija, ka dav tut jekh zlatno lanco hem ka čerav tut te ove o trito najmoćno manuš ko Vavilon.“ O Danilo phendža ljese: „Na mangava te de man ništa, ama ka vačerav tuče so značinena akala lafija. Toklo dad, o Navuhodonosor, hine but ponosno, ama o Jehova ponizindža lje. Tu džaneja sa odova, a paljem pijea kotar zlatna čaše ando Devljeso hram. Odoljese, o Devel pisindža akala lafija: mene, mene, tekel hem farsin. Akala lafija značinena so o Medijancija hem o Persijancija ka osvojinen o Vavilon, a tu na ka ove više kralj.“

Ko odova vreme, o manuša mislindže so o Vavilon našti niko te osvojini. Ki akija diz hine bare zidija kola štitindže la hem uzo olate hine hor reka. Ama, ki odija  rat, o Medijancija hem o Persijancija napadindže o Vavilon. O persijsko kralj, o Kir, čerdža i reka te džal ki aver strana hem adžahar o vojnikija šajindže te resen dži e dizjake udara. Ked i vojska reslja dži ko udara, on hine phravde! I vojska khuvdža ki diz, osvojindža o Vavilon hem mudardža e kraljo. Tegani o Kir ulo kralj ko Vavilon.

Ko prvo berš ked počmindža te vladini, o Kir objavindža: „O Jehova phendža maje te obnovinav oljeso hram ko Jerusalim. Sare so služinena e Jehovase, šaj te džan uduri hem te pomožinen ako mangena.“ Nakhlja 70 berš sar hine uništimi i diz, hem tegani but Jevreja irindže pe ko Jerusalim sar so obećindža o Jehova. Da li dikheja sar o Jehova koristindža e Kire te šaj te pomožini peklje narodose?