Прожыля время и андо Вавилоно ля тэ правий о царё Валтасаро. Еқвар вэчэром, во стодя бари мисяйля и ақардя пэр латэ тысяча манушэн. Када сас само ашунглэ мануша андэ лэско царство. Сар бэшэнас, ханас и пэнас, о Валтасаро ԥэндя пэстирэ слуӷонэнди, кай вонэ тэ анэн сомнаконэ чаши, савэ о Навуходоносоро заля анда лэ Иеговаско храмо. О царё и мануша, савэ лэстэ авелэ, линэ тэ пэн анда кадэла чаши о вино и линэ тэ прославляют пэстирэ дэвлэн. И акэ вонэ диқэн манушыкано вас. Кадэва вас ля тэ пистрой пэ стина андо зало алава, савэ вонэ нащи полэнас.

О Валтасаро фартэ пэрэдарайля. Во ақардя кодэлэн, ко драбатярэн и дя алав лэнди: «Кодэлэс, ко росԥэнэна манди кадэла алава, мэ става, кай во тэ авэл трито баро мануш андо Вавилоно». Кодэла, ко драбатярэн, камлэ тэ полэн, со пистромэ пэ стина, но лэндэ нисо на вижыля. Пала када вся ашундя и царица. Вой авеля каринг о царё и ԥэндя: «Машкар тирэ слуӷоря исин мануш, савэс ақарэн Даниило. Кадэва мануш росԥэнэнас лэ Навуходоносорости, со сыкавэнас лэстирэ сунэ и заӷадки. Во поможыя тути тэ полэс, со пистромэ пэ стина».

Тоди о Даниило авеля каринг о царё. О Валтасаро ԥэндя лэсти: «Кала ту росԥэнэса, со пистромэ пэ стина, тоди мэ дава тути сомнак, саво столпэ пэ кор и мэ става тут, кай ту тэ авэс трито баро мануш андо Вавилоно». О Даниило ԥэндя: «Манди на трэбуй тирэ подаркоря, но мэ росԥэнава тути, со сыкавэн кадэла алава. Тиро дад о Навуходоносоро завазгля о шэро, но Иегова тэлярдя лэс. Ту пала када ӷанглян и всаек на лажайлян лэ Иеговастар, кала пилян анда сомнаконэ чаши, савэ анда лэско храмо. Важ када о Дэл пистросардя кадэла алава: „Ме́не, ме́не, те́кел и па́рсин“. Вонэ сыкавэн, кай и мидяноря и персоря захутилэна о Вавилоно, ай ту парашэса тэ авэс царё».

Здэласпэ, кай о форо Вавилоно нико на захутилэла. Важ кода кай лэстэ сас ҭулэ и барэ стины, ай кадяжэ  сас бари лэн. Андэ кодэя рят и мидяноря и персоря динэ по форо. О персидско царё о Киро стердя кадя, кай о паи анда лэн тэ сжал. Тоди лэстирэ воиноря моӷли вушэро тэ поджан каринг и вороты. И акэ и вороты сас ԥэрнадэ! И воиноря зажылэ андо форо и захутилдэ лэс. Вонэ кадяжэ умардэ лэ царёс лэ Валтасарос. Кадя о Киро ля тэ правий лэ Вавилоноса.

На прожыля бэрш, кала о Киро ԥэндя: «О Иегова приԥэндя манди тэ ваздав о храмо андо Иерусалимо, кай во упалэ тэ авэл. Всаворэ евреёря, савэ камэн тэ поможын андэ када, моӷут тэ жан». Кадя стердяпэ лэ Иеговаско алав, андэ саво во ԥэндя, кай евреёря ринапэ цэрэ андо Иерусалимо. Кала? Сар прожана 70 бэрш после кода, сар лэс розмардэ. О Киро рисардя лэ евреёнэнди и сомнаконэ и рупонэ чаши и посуда, савэ заля о царё о Навуходоносоро анда храмо. Кадя через о Киро о Иегова поможысардя пэстирэ народости.