Yannate gedensaanni Belshaazaari yinanni manchi Baabiloonete moote ikki. Mitto hashsha, isi jila jile lowoha ayirradda manna woshshi. Belshaazaari annisi Nabukadanatsoori Yihowa mininni abbinoha woyine anganni uduunne abbitannosi gede soqqamaanosi hajaji. Belshaazaarinna isi woshsheenna dayino manni, hakko uduunninni woyine aganni magannansa galaxxi. Hedeweelcho mannu baalu gamba yee noowa mannu anga fulte girgiddu aana leeltannokki borro borreessitu.

Tennera Belshaazaari lowo geeshsha masi. Isi kiilaanosi woshshe togo yiinsa: ‘Tenne borro nabbawe tiro kulannoehu Baabiloonete sayikkiha qara moote ikkanno.’ Insa borro nabbabbe tirate woˈnaaltu; kayinni insa giddo mittuno tira didandiino. Hakkiinni mootitte amasi dagge togo yitusi: ‘Alba Nabukadanatsoorira haaqee tirannosihu Daanieeli yinanni manchi no. Isi kuri qaalla tiro kulahera dandaanno.’

Daanieeli mootenniwa dayi. Belshaazaari Daanieelira togo yii: ‘Tenne qaalla nabbabbe tirose kulittoero, culkunni loonsoonniha goowaho wodhatto uduunne eemmohe, hattono Baabiloonete sayikkiha qara moote ikkatto.’ Daanieeli togo yii: ‘Konne uduunne diadheemmo; kayinni kuri qaalla tiro kuleemmohe. Annikki Nabukadanatsoori alba booˈnaleessaho, hakkiinni Yihowa iso shollishinosi. Annikki ikkinota affanni heedhenni atino Yihowa diayirrisootto; Yihowa mininni abbinoonnihu culkunni loonsoonni uduunnichinni woyine agootto. Konni daafira Yihowa togo yee borreessino: Maane, Maane, Teqeli Faareesi. Tenne qaalla tiro, “Meedooninna Faarsi manni Baabiloone qeelanno, atino xaate moote diˈˈikkatto” yaate.’

Alba Baabiloonete katama qeela dandaannohu nookkiha lawanno. Kuni katami seedu huxxi nooho, qoleno qile wayi doyissinoho. Kayinni hakko hashshanni  Meedooninna Faarsi manni Baabiloone qasi. Faarsi moote Qiroosi, olantosi katamu xullichi widoonni higge eˈanno gedenna wayi wolewa hige daadanno gede assino. Insa hakkira martanno woyite katamu xullichi faˈname no. Olanto katamu giddora eˈe qasse qeeltu, hattono Baabiloonete moote shitu. Hakkiinni Qiroosi Baabiloonete moote ikki.

Mittu diri gedensaanni, Qiroosi mannaho togo yee lallawi: ‘Yihowa Yerusaalamete katami giddo qullaawa mine galagale mineemmosi gede hajajinoe. Maganu manna ikkitinoonniri baalu hadhine mina dandiitinanni.’ Konni daafira, Yihowa coyiˈrinonte gede, lowohu Yihudu manni Yerusaalame baˈuhunni 70 diri gedensaanni gobbansa higino. Qiroosi, Nabukadanatsoori qullaawu mininni abbinoha culkunninna birrunni seekkinoonni uduunnenna wole uduunneno qole soyino. Yihowa mannasi kaaˈlate Qiroosi horoonsiˈrino gara afitto?