Lafa nandeha ty fotoa, le nanjary mpanjaka ta Babylona tao Belsazara. Nanasa olo manan-kaja arivo tamy tany iny eo ie, ndraiky haly zay. Nanao fety rozy. Nirahiny mpanompony rey mba hangalaky kopy volamena, azy nalani- Nebokadnezara baka amy tempolini-Jehovah any rey. Nino divay amy kopy rey Belsazara noho vahininy rey sady nidera ty ndranaharin-drozy. Tampoky teo, nisy tana bevata biby nanoratsoratsy tamy rindrini-trano iny eo. Tsy nisy nahay namaky ani-soratsy io sady tsy nisy nahay ty dikany.

Natahotsy biby Belsazara. Nikaihiny mpanao mazỳ rey, le nampitamaniny hoe: ‘Laha misy olo mahay manazava ani-safà reo, le ie ro hataoko manam-pahefà anabo biby a Babylona etoa.’ Samby niezaky nivola rozy, fe tsy nisy nahay ty dikani-safà rey. Nivola amy zay renini- mpanjaka iny hoe: ‘Misy lahilahy mana anara Daniela zay mpana- zava raha tamy Nebokadnezara. Hainy hazavàny aminao safà reo.’

Niavy amy mpanjaka ao amy zay Daniela. Nivola taminy Belsazara hoe: ‘Laha mahay mamaky ani-safà reo iha, le hameako ravaky volamena sady hataoko manam-pahefà anabo biby a Babylona etoa.’ Namaly ie hoe: ‘Tsy mila raha ameanao reo aho, fe hovolaniko aminao avao ty dikani-safà reo. Nirengirengy Nebokadnezara babanao, fe najetsini-Jehovah. Hainao iaby raha nahazo azy rey, fe mbo tsy nanaja ani-Jehovah avao iha fa mbo nino divay tamy kopy volamena tamy tempoliny ao rey. Farany nisorati-Ndranahary safà retoa: Mene, Mene, Tekela, noho Parsina. Dikani-zay, ho resini-Medianina noho Persianina rey Babylona, le tsy ho mpanjaka sasy iha.’

Laha hentea, le tsy misy afaky mandresy ani- Babylona. Voaaro soa tanà io satria misy lakorovato matevy biby, sady nisy ranobe laliky ty manodidy azy. Fe tamy haly iny avao, le nanafiky an-drozy ty Medianina noho Persianina. Nataoni-Kyrosy mpanjakani-Persa  ritsy vavarano iny, soa ho afaky handeha amy vavahadini-tanà io eny maramilany rey. Lafa niavy eny rozy, le fa nivoha vavahady iny! Niaraky nilitsy ao amy zay maramila maro biby rey. Lafa niresin-drozy tanà iny, le nivonoan-drozy Belsazara. Bakeo nanjary mpanjakani-Babylona Kyrosy.

Lafa afaky tao raiky, le zao ty nambarani-Kyrosy: ‘Nivola tamiko Jehovah mba hamboariko ndraiky tempoliny a Jerosalema any iny. Mahazo miasa any vahoakiny reo laha ta ho any.’ Tanteraky raha nampitamanini-Jehovah iny. Maro ty Jiosy noly ta Jerosalema tany, 70 tao tafarani-naharava azy iny. Nampolini-Kyrosy koa kopy volamena noho volafoty rey, miaraky amy ty fitaova nalani-Nebokadnezara tamy tempoly tao. Nihaini-Jehovah ty nampiasa ani-Kyrosy mba hanampeany ty vahoakiny. Tiaronao va ty raha nataony?